ჯანდაცვის მინისტრის, ეკატერინე ტიკარაძის განცხადებით, მედისაშუალებების წარმომადგენლების ვაქცინაციასთან დაკავშირებით მნიშვნელოვანი გეგმა აქვთ. როგორც მან რუსთავი 2-ის ეთერში ისაუბრა, დეტალებზე სამინისტრო მოგვიანებით ისაუბრებს.

"ჩვენ მოგცემთ ფართო შესაძლელობას ვაქცინის შერჩევისას და ასევე განსაკუთრებულ პირობებსაც, რათა მედიას არ ჰქონდეს შეფერხება, დავუშვათ, განსაკუთრებულ რიგში დაყოვნების კომპონენტში. ვამუშავებთ კონკრეტულ პროექტს და მეტი დეტალის დადგენის შემდეგ გავაცნობთ მედიის წარმომადგენლებს. ასევე, მოვმართავთ ოფიციალური წერილით, რის შემდეგაც მივიღებთ დაზუსტებულ სიებს, რის შემდეგაც ორგანიზებულად მოხდება მედიასაშუალებების აცრა", — განაცხადა ტიკარაძემ.

საქართველოში კორონავირუსის წინააღმდეგ ვაქცინაცია 15 მარტს დაიწყო და გარკევული ჯგუფის პირებისთვის იყო ხელმისაწვდომი. 4 მაისს კი 18 წლის ზემოთ პირებისთვის ჩინური ვაქცინა სინოფარმი გახდა ხელმისაწვდომი, რომელსაც ჯერ ჯანმრთელობის მსოფლიო ორგანიზაციისგან ავტორიზაცია მიღებული არ აქვს.

WHO-ს ნებართვის მიღების შემთხვევაში, ჩინური Sinopharm იქნება პირველი ვაქცინა არადასავლური ქვეყნიდან, რომელმაც ჯანდაცვის მსოფლიო ორგანიზაციისგან მიიღო ნებართვა. ამ ეტაპზე კი, WHO-ს საგანგებო გამოყენების ნებართვა გაცემული აქვს ისეთი ვაქცინებისთვის, როგორიცაა Pfizer-BioNTech, AstraZeneca and Johnson & Johnson.