ჰომოფობიური, ქსენოფობიური, პრორუსული და ძალადობრივი ჯგუფების ლიდერს, ლევან ვასაძეს პოლიტიკოსობა უნდა. დისკრიმნაციული გამონათქვამებით და სიძულვილის ენით ცნობილი ვასაძე ამტკიცებს, რომ აქვს გეგმა ქვეყანაში ერთმანეთის სიძულვილის, უიმედობისა და უკანონობის დასასრულებლად.

"მივიღე პირად ჭრილში ჩემთვის ძალიან მძიმე გადაწყვეტილება, სანამ დავემშვიდობები საბოლოოდ ჩემთვის ასე საყვარელი კერძო პირის მდგომაროებას, გადავდგა ნაბიჯი, შემოვიდე და მივიღო მონაწილეობა ქვეყნის საზოგადოებრივ-პოლიტიკურ ცხოვრებაში. ჩემი გადაწყვეტილების ძირითად მიზეზად მოგვევლინა ის ფაქტი, რომ ქვეყანა შესულია პერმანენტული კრიზისის პირობებში, როგორც პოლიტიკური ისე ეკონომიკური, კულტურული, სოციალური, იდეოლოგიური თვალსაზრისით", — განაცხადა მან ბრიფინგზე.

ვასაძემ საზოგადოებრივი მოძრაობა შექმნა, რომელსაც "ერთობა, რაობა და იმედი" დაარქვა, რისი აბრევიატურაც "ერი" გამოდის. მისი თქმით, ეს მოძრაობა პოლიტიკურ პარტიად გარდაიქმნება, როცა "ამის საჭიროება იქნება".

ვასაძე ამტკიცებს, რომ პოლიტიკაში მოსვლით მისთვის არასასურველ ნაბიჯს დგამს და ამის განმაპირობებელი "ბოლო წვეთი" იყო ევროპული საბჭოს პრეზიდენტის ეგიდით შექმნილი შეთანხმების დოკუმენტის ხელმოწერა. თუმცა, პოლიტიკური აქტივობის დაწყებაზე ის ჯერ კიდევ 2019 წელს საუბრობდა.

ლევან ვასაძე, რომელიც თავს რაინდს უწოდებს, სხვადასხვა დროს ხელმძღვანელობდა არაერთ ჰომოფობიურ და ქსენოფობიურ აქციას, ესხმოდა თავს დასავლურ ინსტიტუტებსა და დიპლომატებს. ის აგრესიულია ჟურნალისტების მიმართა და ცნობილია ვლადიმერ პუტინის მთავარ იდეოლოგთან, ალექსანდრ დუგინთან მეგობრობით.

ვასაძე ერთ-ერთი ორგანიზატორი იყო იმ ჰომოფობიური აქციისა, რომლის მიზანიც ფილმ And Then We Danced-ის ჩვენების ჩაშლა იყო. ასევე, მეთაურობდა სირცხვილიასა და თბილისი პრაიდის საწინააღმდეგო აქციას, როცა ღირსების მარშის ჩაშლას ცდილობდა, თუმცა არცერთი გამოუვიდა.

ვასაძემ შექმნა ძალადობრივი ჯგუფი, რომელსაც კომბლებითა და ქამრებით ლგბტ თემზე ძალადობა დაავალა. გარდა ამისა, ამბობდა, რომ კომბლებით წინააღმდეგობას გაუწევდა პოლიციასაც.