პასკების სეზონი სრულდება და საქართველოში ყველაზე ხშირად ახლა მხოლოდ ამ ორ ფრაზას მოჰკრავთ ყურს: "ის ბოლო ნაჭერი არ უნდა მეჭამა" ან "აი, ეს ერთი პასკაც და მორჩა, ბოლოა!" მაგრამ ამ უკანასკნელს ვინც იძახის, სიტყვის შესრულების მერე, დიდი ალბათობით, მაინც იმათ კლუბს შეემატება, ვინც უკვე ნანობს ქიშმიშიანი, უქიშმიშო, სველი, მშრალი, შოკოლადიანი თუ ცუკატებიანი პასკებით მუცლის ამოვსებას.

თუმცა, შეიძლება იმან მაინც დაგამშვიდოთ, რომ მარტო არ ხართ: არა მხოლოდ საქართველოს მოსახლეობის დიდი ნაწილი წუხს თქვენთან ერთად, არამედ უილ სმიტიც აღარ არის ძველებურ ფორმაში. მიუხედავად ამისა, ეს სულაც არ ნიშნავს იმას, რომ ის საკუთარი სხეულით ზედმეტად უკმაყოფილოა, სულ პირიქით — თამამად გვიზიარებს თავის ფოტოსაც.

"გულწრფელი ვიქნები და გეტყვით, რომ ასეთ ცუდ ფორმაში აქამდე არ ვყოფილვარ", — წერს მსახიობი ფეისბუქის პირად ანგარიშზე.

ფილმების მე ვარ ლეგენდა, ჰენკოკი და კაცი შავებში ვარსკვლავიც კი აძლევს საკუთარ თავს უფლებას, რომ ხანდახან მოდუნდეს, ამიტომ შეგვიძლია, არც ჩვენ დავითრგუნოთ ზედმეტად თავი კალორიების დათვლით.

ან თუ მაინც დისკომფორტს იგრძნობთ, მაშინ მშვენიერი მიზეზი გეძლევათ ვარჯიშის დასაწყებად.

ფოტო: Gifer