სამწლიანი მშენებლობის შემდეგ, კომპანია Apple-ის ახალი სათავო ოფისის მშენებლობა დასასრულს მიუახლოვდა. ფუტურისტული კამპუსი Apple Park აპრილში გაიხსნება და თავის კედლებში 12 ათას თანამშრომელს მიიღებს.

ოფისის მთავარი შენობის ფართობი 260 ათასი კვადრატული მეტრია, რომელიც ყველა სხვა შენობასთანაა დაკავშირებული.

ახალ კომპლექსში სტივ ჯობსის პატივსაცემად დარბაზიც იხსნება.

ფოტო: Apple

შენობა, რომელიც ახალი კამპუსის ერთ-ერთ გორაკზეა აშენებული და სათავო ოფისს გადმოჰყურებს, ათას მაყურებელს დაიტევს.

ეფლ პარკში ასევე იქნება ვიზიტორების ცენტრი, მაღაზია, ფიტნესცენტრი თანამშრომლებისთვის და კვლევითი ცენტრი. კომპლექსი მთლიანად განახლებადი ენერგიით მომარაგდება, რომელსაც შენობების სახურავებზე განთავსებული მზის ენერგიის 17 მეგავატის სიმძლავრის პანელები გამოიმუშავებს.