თბილისში დააკავეს პირი, რომელიც სასაფლაოზე შესვლას ცდილობდა. მისი თქმით, ბაბუის საფლავზე პასკისა და კვერცის მიტანა სურდა, რისი უფლებაც სამართალდამცავებმა არ მისცეს.

ადგილზე მყოფმა პოლიციელებმა მას განუმარტეს, რომ არ შეუშვებდნენ და კანონიერი მოთხოვნისადმი დაუმორჩილებლობის შემთხვევაში დააკავებდნენ. თუმცა მოქალაქე ამბობდა, რომ ეს მოთხოვნა კანონიერი არ არის და მაინც ცდილობდა შესვლას. შსს-ს წარმომადგენლის განცხადებით, ის ადმინისტრაციულ სამართალდარღვევათა კოდექსის მუხლით, პოლიციისადმი დაუმორჩილებლობის ბრალდებით დააკავეს.

საკოორდინაციო საბჭოს გადაწყვეტილებით, სადღესასწაულო დღეებში სასაფლაოებზე გასვლა აკრძალულია. ქალაქებსა და სოფლებში სასაფლაოების წინ საპატრულო ეკიპაჟებია მობილიზებული. შინაგან საქმეთა სამინისტროს განცხადებით, 2-4 მაისის ჩათვლით სასაფალოზე არსებული შეზღუდვების დარღვევის შემთხვევაში მოქალაქეს 2000 ლარიანი ჯარიმა დაეკისრება.