ქართველმა ჩოგბურთელმა, ნიკოლოზ ბასილაშვილმა ანგარიშით 6-4, 7-6 მიუნხენის ტურნირი მოიგო.

"ეს ბასილაშვილისთვის მეხუთე ტიტულია ამ დონის ტურნირზე", — ვკითხულობთ პროფესიონალ კაც ჩოგბურთელთა ასოციაციის ტვიტერის ოფიციალურ გვერდზე.

2021 წელს ბასილაშვილმა მოიგო დოჰას ტურნირიც. სწორედ ამ ტურნირის მეოთხედფინალში დაამარცხა მან ლეგენდარული ჩოგბურთელი როჯერ ფედერერი.

საქართველოს ისტორიაში ყველაზე წარმატებულ ჩოგბურთელს ყოფილი ცოლი, ნეკა დოროყაშვილი ძალადობაში ადანაშაულებს. ნიკოლოზ ბასილაშვილს არასრულწლოვანი შვილის თანდასწრებით ყოფილ ცოლზე ძალადობაში ედება ბრალი. მას თბილისის საქალაქო სასამართლომ 100 ათასი ლარის ოდენობის გირაო შეუფარდა. სპორტსმენი დანაშაულს არ აღიარებს. ამასთან, შემაკავებელი ორდერია გამოცემული როგორც ჩოგბურთელის, ისე მისი მშობლების მიმართ.

პროკურატურის ინფორმაციით, ბასილაშვილმა ყოფილ ცოლს ფიზიკური შეურაცხყოფა გასული წლის 21 მაისს მიაყენა, მეორე დღეს კი ის დააკავეს. საქმის შესწავლა დაიწყო სახალხო დამცველმაც.