აუდიტის სამსახურის ანგარიშის თანახმად, 2018-2019 წლებში მთის კურორტების განვითარების კომპანიის თანამშრომლებსა და მათი ოჯახის წევრებზე 133 000 ლარის საბაგირო გზის უფასო აბონემენტი გაიცა.

როგორც დოკუმენტში ვკითხულობთ, 2018 და 2019 წლების იანვარში მხოლოდ კურორტ გუდაურში უფასოდ 115 ცალი 64 100 ლარის ღირებულების აბონემენტია გაცემული.

აუდიტის სამსახურში აცხადებენ, რომ კომპანიამ ვერ წარმოადგინა აბონემენტებით უფასოდ მოსარგებლე პირთა სრული სიის დოკუმენტი. გარდა ამისა, აღნიშნულია, რომ ანალოგიურ პერიოდში 128 ათასი ლარის უფასო აბონემენტია გაცემული VIP მომხმარებლებზე. თუმცა ანგარიშში ვკითხულობთ, რომ აბონემენტი დარიგდა მაიდენტიფიცირებელი მონაცემების გარეშე და არ არის დადგენილი, კრიტერიუმი, თუ როგორ განისაზღვრება VIP მომხმარებელი.