შინაგან საქმეთა სამინისტროს ინფორმაციით, ფონიჭალაში სამი ნარკორეალიზატორი დააკავეს, რომელთაც საქმიანობაში მცირეწლოვანიც ჰყავდათ ჩართული. უწყების ცნობით, დანაშაული 8-დან 20 წლამდე ან უვადო თავისუფლების აღკვეთას ითვალისწინებს.

"გამოძიებით დადგინდა, რომ დაკავებულებმა წინასწარ შემუშავებული გეგმის მიხედვით, გაინაწილეს როლები და ნარკოტიკულ საშალებებს სისტემატურად ასაღებდნენ. გეგმის მიხედვით, ერთ-ერთი დაკავებული ნარკოტიკული საშუალებების შემძენ პირებთან კომუნიკაციას, ხოლო ორი ბრალდებული მყიდველისთვის დათქმულ ადგილზე ნარკოტიკული საშუალებების განთავსებას და ფულის მიღებას უზრუნველყოფდა. მათ დანაშაულებრივ საქმიანობაში, სამწუხაროდ, ჩართული ჰყავდათ მცირეწლოვანი ბავშვი", — აცხადებენ უწყებაში.

შსს-ს განცხადებით, საქმეში ჩაერთო, როგორც სოციალური სამსახური, ასევე, ყველა სხვა შესაბამისი უწყება.

უწყების ინფორმაციით, გამოძიება საქართველოს სისხლის სამართლის კოდექსის 260-ე მუხლით მიმდინარეობს, რაც წინასაწრი შეთანხმებით ჯგუფის მიერ განსაკუთრებული დიდი ოდენობით ნარკოტიკული საშუალებების შენახვა-შეძენასა და გასაღებას გულისხმობს.