სტრატეგია აღმაშენებლის ლიდერის, გიორგი ვაშაძის განცხადებით, პარლამენტის თავმჯდომარის გადადგომა ნიშნავს, რომ ქართული ოცნება მოლაპარაკებებში თავს დამარცხებულად თვლის და ერთ-ერთი მთავარი მომლაპარაკებელი დასაჯა ამისთვის.

"მე ვფიქრობ, ეს არის პასუხი ოპოზიციის მხარდამჭერებისთვის ან ოპოზიციური პოლიტიკოსებისთვის, რომლებსაც გულით უნდა, რომ ეს შეთახნმება საკუთარ მარცხად გააფორმოს. დღევანდელი დღით ცხადად დადასტურდა, რომ ქართული ოცნება ოცნება ფიქრობს, რომ ის დამარცხდა ამ მოლაპარაკებებში, მას მოუწია ძალიან ბევრ კომპომისზე წასვლა და ვფიქრობ, ეს კარგია ჩვენი ქვეყნისთვის", — განაცხადა მან TV პირველის ეთერში.

მისი განმარტებით, ქართული ოცნება შეთანხმებას თავის მარცხად მიიჩნევს, რადგან მოუწია პოლიტიკური მართლსაჯულებისა და საპარლამენტო არჩევნების ლეგიტიმაციის პრობლემის საკითხი ეღიარებინა. ასევე, მარცხად მიიჩნევს იმას, რომ საარჩევნო კომისიებში მონოპოლიები დაკარგა და უზენაესი სასამართლოს მოსამართლეების შერჩევის პროცესი დაკარგა.

კითხვაზე, რატომ უნდა დაესაჯათ ამის გამო თალაკვაძე, როცა ამ პროცესში ის არ იქნებოდა მთავარი გადაწყვეტილებების მიმღები პირი, ვაშაძე პასუხობს:

"მე პირდაპირ გეტყვით, რომ თალაკვაძე ამ პროცესში გაცილებით უფრო მეტად იყო შეთანხმებაზე ორიენტირებული, ვიდრე კობახიძე. ეს არის სიმართლე და რეალობა. ვის მეტი გავლენა ჰქონდა და ძალაუფლება, ეს ცალკე საკითხია".

დღეს, 24 აპრილს არჩილ თალაკვაძემ განაცხადა, რომ პარლამენტის თავმჯდომარის თანამდებობას ტოვებს. წასვლის მიზეზად ის დაასახელა, რომ აქტიურად იყო ჩართული მოლაპარაკებების პროცესში როგორც მხარე, პარლამენტის სპიკერი კი მიუკერძოებელი უნდა იყოს.

"ახლა, როცა პარლამენტში წარმომადგენლობითი ოპოზიცია გვყავს, ვთვლი, რომ ჩემი ადგილი დარბაზშია, კოლეგების გვერდით და არა სპიკერის პოზიციაზე", — განაცხადა მან ბრიფინგზე.

ქართული ოცნების თავმჯდომარემ, ირაკლი კობახიძემ ხაზი გაუსვა იმ ფაქტს, რომ თალაკვაძემ ეს გადაწყვეტილება თავად მიიღო. პარლამენტის თავმჯდომარეობის კანდიდატად მან კახა კუჭავა წარადგინა და აღნიშნა, რომ თალაკვაძე ვიცე-სპიკერი გახდება.