გარე ბაზრობები, გამოფენები, ძველ ნაცნობებთან უცაბედი შეხვედრები ან უბრალოდ სხვადასხვა ფერადი და ლამაზ-ლამაზი ნივთების თვალიერება თუ მოგენატრათ, კვირას, 25 აპრილს ორბელიანის მოედანზე, სააღდგომო ბაზრობაზე შეიარეთ.

ბაზრობა სოციალურ საწარმოთა ალიანსის ორგანიზებით იმართება და ალიანსის წევრი 17 საწარმო მიიღებს მონაწილეობას.

იცი რას გულისხმობს სოციალური მეწარმეობა?

სოციალური საწარმოები წარმოადგენენ ისეთ საწარმოებს, რომლებიც სხვადასხვა სახის სოციალურ პრობლემას სამეწარმეო მიდგომებით აგვარებენ. სოციალური მეწარმეობა შედარებით ახალი კონცეფციაა, რომელიც ბიზნესის "ახლებური გზით" კეთებას გულისხმობს. კლასიკური გაგებით ბიზნესისგან სოციალურ საწარმოს სწორედ მისი სოციალური ბუნება განასხვავებს - ის იქმნება კონკრეტული პრობლემის მოსაგვარებლად და მოგებაც სწორედ ამ პრობლემის გადაჭრისკენ მიემართება.

ვის შეხვდები ორბელიანზე?

ბაბალე, დადარი, ეთნოდიზაინი, თემი, იალონი, ისტორიალი, კაფუნე, არაბული არტ-ჰაუსი, ნუკრიანის სახელოსნოები, პოტერია, სამეზობლო, იკორთა, კოდალა, ჩირიგე, ჩუ, 7R, ფარშევანგი.

შესაძლოა ყველა სოციალური საწარმოს სახელი ვერ დაიმახსოვროთ, თუმცა გეტყვით რომ უმშვენიერეს ხის, თიხის, ტექსტილის ნივთებსა თუ აქსესუარებს დაათვალიერებთ, სამაგიდო თამაშებით გაერთობით, გემრიელ კერძებს დააგემოვნებთ და თუ მოგინდებათ თიხის მასტერკლასზეც შეივლით.

სააღდგომო ბაზრობის მთავარი იდეა და მიზანი სოციალური საწარმოების ეკონომიკური გაძლიერება, პროდუქციის გაყიდვების ხელშეწყობა და კონცეფციის პოპულარიზაციაა.

ღონისძიების მხარდამჭერები თბილისის მერია და "ქარავანი" არიან. ბაზრობა იმართება ევროკავშირის მხარდაჭერით მიმდინარე პროექტის "სოციალური მეწარმეობის განვითარება მდგრადი და ინკლუზიური საზოგადოებისთვის" ფარგლებში.