პრეზიდენტს სალომე ზურაბიშვილის განცხადებით, გაკვირვებულია, რომ მმართველი პარტია მის სახელს მისი ნებართვის გარეშე იყენებს. საუბარია, გიორგი რურუას შეწყალებაზე.

"გაკვირვებული ვარ მმართველი პარტიის მეირ დღეს გაკეთებული განცხადებით, რომელიც ჩემი ნებართვისა და თანხმობის გარეშე ჩემს სახელ იყენებს და აკავშირებს ერთ კონრეტულ შეწყალების თემას. ის ვერ გაიგეს მავანმა, რომ გადაწყვეტილებას, მით უმეტეს ამ საკითხებში და არამხოლოდ, ვიღებ მოსალოდნელ კრიტიკისა თუ შექების მიუხედავად იმ და მხოლოდ იმ შემთხვევაში, თუ ვთქვი საჭიროდ. ეს მგონი უკვე საქმის დავამტკიცე.

მინდა ყველას შეგახსენოთ ერთი მარტივი წესი რომ შეწყალების უფლებამოსილება არის პრეზიდენტის დისკრეცია და არა მოლაპარაკებების საგანი. ისიც მინდა ნათელი იყოს, რომ შეწყალების გადაწყვეტილება, როგორც არაერთხელ მითქვამს, არ ექვემდებარება რაიმე ზეწოლას, მითითებებსა თუ მოთხოვნებს ეს იქნება ოპოზიციისგან თუ მმართველი პარტიისგან, არც სხვისგან", — თქვა სალომე ზურაბიშვილმა.

მისი თქმით, შეწყალების შესახებ გადაწყვეტილებაზე წინასწარ არ საუბრობს, მაგრამ ამ თემაზე სხვებისგან აპელირების გამო, იძულებული გახდა დაარღვიოს ეს პრინციპი, "რათა ყოველგვარი სპეკულაცია შეწყდეს". სალომე ზურაბიშვილის პოზიციაა, რომ გიორგი რურუას შეიწყალებს მხოლოდ მას შემდეგ, რაც ქართული ოცნება და ოპოზიცია შეთანხმებას ხელს მოაწერენ და პარლამენტში შევლენ.

დღეს, 19 აპრილს ქართულმა ოცნებამ განაცხადა, რომ თუ გიორგი რურუას საქართველოს პრეზიდენტი შეიწყალებს, ისინი კრიტიკულ პოზიციას არ დააფიქსირებენ, მიუხედავად იმისა, რომ ეს მართლმსაჯულებაში ჩარევის უხეშ მაგალითად მიაჩნიათ.

18 აპრილს ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

დოკუმენტი ხუთპუნქტიანია, რომელიც მოიცავს პოლიტიკოსების გათავისუფლებასაც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: