საქართველოს შინაგან საქმეთა სამინისტროს ინფორმაციით, სამეგრელოში, სოფელ ხაიშში მოქალაქეებმა დაკავების დროს პოლიციელებს წინააღმდეგობა გაუწიეს და ფიზიკური შეურაცხყოფა მიაყენეს, რა დროსაც ერთი პოლიციელი დაშავდა.

უწყებაში ამბობენ, რომ შემთხვევა 17 აპრილს მოხდა და პოლიციელზე ჯგუფური წინააღმდეგობის ბრალდებით სამი ადამიანი დააკავეს. მათივე ინფორმაციით, სხვების დაკავების მიზნით საგამოძიებო ღონისძიებები გრძელდება.

"ბრალდებულებმა მიმდინარე წლის 17 აპრილს, ხაიშში სამართალდარღვევის ფაქტზე რეაგირების დროს პოლიციელებს წინააღმდეგობა გაუწიეს და ფიზიკური შეურაცხყოფა მიაყენეს. დაშავდა ერთი პოლიციელი, რომელსაც პირველადი სამედიცინო დახმარების გაეწია, მისი ჯანმრთელობის მდგომარეობა დამაკმაყოფილებელია. პოლიციამ ბრალდებულები დანაშაულის ჩადენიდან მალევე ხაიშში დააკავა", — აცხადებენ უწყებაში.

გამოძიება საქართველოს სისხლის სამართლის კოდექსის 353-ე მუხლის მე-2 ნაწილით მიმდინარეობს, რაც პოლიციის მიმართ ჯგუფურ წინააღმდეგობას გულისხმობს. ეს 4-დან 7 წლამდე ვადით თავისუფლების აღკვეთას ითვალისწინებს.