ევროპარლამენტარი ვიოლა ფონ კრამონი დადებითად აფასებს ქართული ოცნების გადაწყვეტილებას დოკუმენტის ხელმოწერაზე და აცხადებს, რომ ქვეყნის გულისთვის ახლა ოპოზიციამაც იგივე უნდა გააკეთოს.

"კარგია, რომ ქართული ოცნება აჩვენებს კომპრომისისთვის მზადყოფნას. ეს სწორი ნაბიჯია სწორი მიმართულებით. საქართველოს გულისთვის ოპოზიციამაც უნდა მიბაძოს. ამასობაში, ჯერ კიდევ რჩება ბევრი დეტალი, რომელთა შემუშავებაც აუცილებელია. ევროკავშირი კვლავ მზად არის დასახმარებლად”, — წერს კრამონი.

პარლამენტის თავმჯდომარის, არჩილ თალაკვაძის განცხადებით, ქართული ოცნება ევროპული საბჭოს პრეზიდენტის, შარლ მიშელის ეგიდით შექმნილ დოკუმენტს ხელს აწერს. მისივე თქმით, დოკუმენტს ზუსტად შემოთავაზებული სახით აწერენ ხელს და შესაბამისად, პარლამენტი იმსჯელებს და მხარს დაუჭერს ივნისის მოვლენების ამნისტიასაც. ამასთან, თალაკვაძემ აღნიშნა, რომ ქართული ოცნება მზად არის, 40%-იანი მხარდაჭერის პრინციპი გამოიყენოს, რაც იმას ნიშნავს, რომ, თუ მმართველი პარტია თვითმმართველობის არჩევნებში 40%-ს ვერ მიიღებს, ისინი ოპოზიციის მოთხოვნებს რიგგარეშე არჩევნებთან დაკავშირებით განიხილავენ.

თალაკვაძის განცხადებას წინ უძღოდა ქართული ოცნების თავმჯდომარის, ირაკლი კობახიძის ამერიკის შეერთებულ შტატებში ვიზიტი. კობახიძის განცხადებით, აშშ-ში შეხვედრებისას პარტნიორები მიანიშნებენ, რომ მათ, როგორც მმართველმა პარტიამ კრიზისის გადასაჭრელად ნაბიჯები უნდა გადადგან.

30 მარტს ქართული ოცნებისა და ოპოზიციის მორიგი მედიაცია უშედეგოდ დასრულდა. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. თავდაპირველად ხელი არ მოაწერა არც მმართველმა პარტიამ.

კრისტიან დანიელსონის მიერ წარმოდგენილ დოკუმენტში საკითხები რამდენიმე პუნქტად იყო დაყოფილი. ის ეხებოდა:

  • პოლიტიზებულ მართლმსაჯულებად აღქმულ საკითხებზე რეაგირებას;
  • ამბიციურ საარჩევნო რეფორმას;
  • კანონის უზენაესობა/სასამართლო რეფორმას;
  • პარლამენტში ძალაუფლების განაწილებას;
  • მომავალ არჩევნებს.