თელასის ფინანსური მენეჯერის, ნიკა ლომინაძის მკვლელობის გახმაურებულ საქმეზე სააპელაციო სასამართლომ დღეს, 20 თებერვალს განაჩენი გამოიტანა და მსჯავრდებულები გია გვიჩიანი და ნიკა ჩემია სასამართლო დარბაზიდან გაათავისუფლდნენ.

სასამართლომ გადაწყვეტილება მას შემდეგ მიიღო, რაც მათ მთავარმა პროკურატურამ მიმართა, რომ დაიწყო ხელახალი გამოძიება და ისინი უდანაშაულოდ მიიჩნიეს.

გათავისუფლებულმა გია გვიჩიანმა სასამართლოდან გამოსვლის შემდეგ ჟურნალისტებთან კომენტარი გააკეთა და მადლობა გადაუხადა ყველა იმ პირს, რომლებმაც მისი საქმის გადახედვაში მიიღეს მონაწილეობა:

"დასრულდა 11-წლიანი უკანონო პატიმრობა, რომლის ძირითადი გამომწვევი მიზეზი იყო ენერგეტიკის სექტორში ჩემი სამსახურეობრივი საქმიანობა და სააკაშვილის რეჟიმი. პერსონალური მადლობა მინდა გადავუხადო იმ ადამიანებს, რომლებმაც 2012 წლის 1-ლი ოქტომბერი გამოიწვიეს. ასევე პერსონალური მადლობა თეა წულუკიანს და ირაკლი შოთაძეს, რომელთა გარეშე, დღევანდელი დღე ჩემთვის არ იქნებოდა".

ნიკა ლომინაძე 2002 წლის 13 აგვისტოს საკუთარ სახლში გარდაცვლილი იპვეს. ოთხი წლის შემდეგ, საქმეზე გია გვიჩიანი დააკავეს და უვადო პატიმრობა შეუფარდეს, მოგვიანებით მას სასჯელი შეეცვალა და 15 წლით თავისუფლების აღკვეთა მიესაჯა.

ნოემბერში პროკურატურამ ლომინაძის მკვლელობის საქმის გადახედვის გადაწყვეტილება მიიღო და ხელახალი გამოძიება დაიწყო.