სოციალური სამართლიანობის ცენტრი (ყოფილი EMC) აცხადებს, რომ სამოქალაქო აქტივისტის, გიორგი მუმლაძის დაკავება და მის მიმართ სისხლის სამართლის კოდექსით დაწყებული გამოძიება სახიფათო პრეცედენტს ქმნის გამოხატვის თავისუფლებისა და დემოკრატიული წესრიგის თვალსაზრისით.

"ბოლო პერიოდში სამოქალაქო აქტივისტების მიმართ დაუსაბუთებელი საპოლიციო ძალის გამოყენების ტენდენცია კრიტიკას და შეშფოთებას იმსახურებს. ამავდროულად, სუსტი და არაეფექტიანია შეკრებისა და მანიფესტაციის უფლების უსაფუძვლოდ შეზღუდვის ფაქტებზე სახელმწიფოს რეაგირება, რასაც მსუსხავი ეფექტი აქვს ამ უფლებით სარგებლობაზე", — წერია მათ განცხადებაში.

მათივე თქმით, ბოლო თვეებში სამართალდამცავებმა არაერთხელ გამოიყენეს გიორგი მუმლაძის მიმართ დაუსაბუთებელი საპოლიციო ღონისძიებები და ადმინისტრაციული სანქციები.

"მოცემულ შემთხვევაში, გიორგი მუმლაძე მოქმედებდა შეკრებისა და მანიფესტაციის უფლებით დაცულ სფეროში, რა დროსაც პოლიციის თანამშრომლების მიერ ფიზიკური ზემოქმედებით ჩიხში მოქცეული ცდილობდა მათგან თავის გათავისუფლებას, რაც საგამოძიებო ორგანოს მიერ შეფასდა სისხლის სამართლის კოდექსით დასჯად ქმედებად", — წერენ ისინი.

ორგანიზაცია აცხადებს, რომ შეკრების უფლების შეზღუდვისას პროტესტის მხარდამჭერების მიერ გამოხატული ნება, გააგრძელონ საკუთარი აზრის გამოხატვა და პოლიციას არ მისცენ დაკავების შესაძლებლობა, არ წარმოადგენს სისხლის სამართლის კოდექსის 353-ე მუხლით გათვალისწინებულ დანაშაულს — პოლიციის თანამშრომლებისთვის წინააღმდეგობის გაწევას.

"აღნიშნული მუხლის ამგვარი ინტერპრეტაცია და სამოქალაქო აქტივისტის მიმართ სისხლისსამართლებრივი დევნის დაწყება შეკრების დროს პოლიციისგან თავის დახსნისკენ მიმართული ქმედების გამო, მორიგი საშიში სიგნალია ქვეყანაში შეკრებისა და მანიფესტაციის უფლებით სარგებლობისთვის. ხელისუფლება აქამდე მრავალგზის ნაცადი ადმინისტრაციული მექანიზმების ნაცვლად, ახლა უკვე იყენებს უფრო მძიმე რეპრესიულ პოლიტიკას და პროტესტის გამოხატვის მიზანმიმართული ხელშეშლის ინტერესით, უხეშად ერევა მშვიდობიანი შეკრების უფლებაში", — წერია განცხადებაში.

სოციალური სამართლიანობის ცენტრი (ყოფილი EMC) მოუწოდებს სამართალდამცავ ორგანოებს:

  • შეწყდეს გიორგი მუმლაძის მიმართ სისხლისსამართლებრივი დევნა;
  • უზრუნველყოფილი იყოს ქვეყანაში მშვიდობიანი შეკრების და მანიფესტაციის უფლებით სარგებლობა;
  • დროულად იყოს გამოძიებული შეკრებისა და მანიფესტაციის უფლებაში უსაფუძვლო, თვითნებური ჩარევის შემთხვევები.

14 აპრილს ქართული ოცნების ოფისთან აქციის დროს ერთი აქტივისტი, გიორგი მუმლაძე დააკავეს. შინაგან საქმეთა სამინისტროს ცნობით, მას პოლიციის თანამშრომლებისთვის წინააღმდეგობის გაწევა ედება ბრალად. დანაშაული 2-დან 5 წლამდე ვადით თავისუფლების აღკვეთას ითვალისწინებს. მუმლაძის დაკავების გასაპროტესტებლად სამოქალაქო აქტივისტები შინაგან საქმეთა სამინისტროსთან მივიდნენ. ისინი შინაგან საქმეთა მინისტრთან შეხვედრას მოითხოვდნენ. აქტივისტების განცხადებით, პოლიციელმა გიორგი მუმლაძეზე ფიზიკურად იძალადა.