საქართველოს პრეზიდენტის, სალომე ზურაბიშვილის განცხადებით, სომხეთის პრეზიდენტ არმენ სარქისიანთან უკრაინაში მიმდინარე პროცესებიც განიხილეს. ამის შესახებ მან სარქისიანთან შეხვედრის დასრულების შემდეგ ისაუბრა.

"რეგიონში სტაბილურობის მნიშვნელობიდან გამომდინარე, განვიხილეთ, ასევე, უკრაინაში შექმნილი საგანგაშო ვითარება, ესკალაცია და დესტაბილიზაცია ემუქრება შავი ზღვის რეგიონს და არა მხოლოდ. ჩვენ გვესმის რამდენად მნიშვნელოვანია ამ რეგიონისთვისაც დღეს დეესკალაცია. განვიხილეთ ჩვენი რეგიონის სამომავლო პოტენციალი, რომელიც უნიკალურია ეკონომიკის კუთხით, გაზრდილი ინტერესი სხვადასხვა გარე აქტორისგან, ახალი გეგმები თუ პლატფორმები, რომლის შესახებაც ისმის, ეს ადასტურებს ამ რეგიონის ძალიან დიდ მნიშვნელობას. თუმცა კავკასიის ქვეყნების როლი გადამწყვეტი რჩება, კავკასიის მომავალი კავკასიის ქვეყნებმა ერთობლივად უნდა განსაზღვრონ, ამავდროულად, კავკასია თავისი სატრანზიტო და სხვა პოტენციალის გათვალისწინებით, მხოლოდ ღია რეგიონად წარმოგვიდგენია", — თქვა მან.

სომხეთის პრეზიდენტი, არმენ სარქისიანი საქართველოში დღეს, 15 აპრილს ჩამოვიდა. მას აეროპორტში დახვდნენ საგარეო საქმეთა მინისტრი დავით ზალკალიანი, პრეზიდენტის ადმინისტრაციის უფროსი ნათია სულავა და საქართველოს ელჩი სომხეთში, გიორგი საგანელიძე. ზურაბიშვილის გარდა საქრისიანი შეხვდება პარლამენტის თავმჯდომარეს, არჩილ თალაკვაძეს. გარდა ამისა, სომხეთის პრეზიდენტი დაათვალიერებს სომხურ საკათედრო ტაძარს თბილისში