გორში 12 წლის გოგოზე სექსუალური ძალადობის საქმეზე, რის შემდეგაც არასრულწლოვანმა ბავშვი გააჩინა, დედას დანაშაულის შეუტყობინებლობაზე ბრალი წარუდგინეს. პროკურატურის ინფორმაციით, დედამ იცოდა, რომ მისი არასრულწლოვანი შვილი გააუპატიურეს და სამართლადამცველებს არ აცნობა.

"მიმდინარე გამოძიებით დადგინდა, რომ 2017 წლიდან 2020 წლამდე ზ.მ. იყენებდა მისთვის წინასწარი შეცნობით 14 წლის ასაკს მიუღწეველი გოგონას ასაკით გამოწვეულ უმწეობას და ძალადობის გამოყენებით, სისტემატურად აუპატიურებდა მას. ზ.მ.-ს ქმედების შედეგად არასრულწლოვანი დაორსულდა და 2020 წლის 21 ივნისს ბავშვი გააჩინა", — ნათქვამია შსს-ს განცხადებაში.

უწყების ცნობით, გამოძიებით დადგინდა, რომ დედასთვის ცნობილი გახდა ზ.მ.-ს მიერ მისი შვილის გაუპატიურების ფაქტი, თუმცა ამის შესახებ სამართალდამცავ ორგანოს არ შეატყობინა.

მას ბრალი საქართველოს სისხლის სამართლის კოდექსის 376-ე მუხლის მე-2 ნაწილით წარედგინა, რაც გულისხმობს დანაშაულის შეუტყობინებლობას იმის მიერ, ვინც ნამდვილად იცის, რომ ჩადენილია განსაკუთრებით მძიმე დანაშაული. ეს სასჯელის სახედ და ზომად 3-დან 7 წლამდე თავისუფლების აღკვეთას ითვალისწინებს.

4 მარტს გავრცელდა ინფორმაცია, რომ გორის რაიონის ერთ-ერთ სოფელში 12 წლის გოგოზე კაცმა სექსუალურად იძალადა, რის შედეგადაც მოზარდი დაორსულდა და იმშობიარა. იმავე დღეს სსიპ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტომ განაცხადა, რომ სექსუალური ძალადობის მსხვერპლი ბავშვი და მისი შვილი სახელმწიფო ზრუნვის სააგენტოს სერვისში არიან ჩართული და იმყოფებიან თავშესაფარში. საქმეში ჩაერთო, ასევე, სოციალური მუშაკი და ფსიქოლოგიც.