საქართველოს მთავარი პროკურორის პირველი მოადგილის, მამუკა ვასაძის განცხადებით, ილია მეორის საქართველოში დაბრუნების შემდეგ პროკურატურა ციანიდის საქმის მტკიცებულებებს გამოაქყვეყნებს. ამის შესახებ ვასაძემ ტელეკომპანია იმედის ეთერში განაცხადა:

"საზოგადოებას ვპირდები, რომ მისი უწმინდესობის საქართველოში ჩამოსვლის შემდგომ გასაჯაროვდება ინფორმაცია მტკიცებულებებთან დაკავშირებით."

ვასაძის თქმით, არსებობს შესაბამისი მტკიცებულებები, სადაც საუბარია კონკრეტულ თანამდებობრივ წინსვლაზე, რასაც მიიღებდა ამ მოვლენების განვითარების შემდგომ ბრალდებული დეკანოზი გიორგი მამალაძე. ამასთან პროკურორის მოადგილე არ აკონკრეტებს იყო, თუ არა კონკრეტულად ილია მეორე მამალაძის სავარაუდო სამიზნე:

"ერთმნიშვნელოვად არც დავადასტურებ და არც უარვყოფ ეს პიროვნება იყო თუ არა პატრიარქი. ამის შესახებ ცოტა მოგვიანებით ვისაუბრებთ, მაშინ, როცა სათანადო მტკიცებულებებს სრულყოფილად გამოვაქვეყნებთ."

ილია მეორე გერმანიიდან, სადაც ნაღვლის ბუშტის ოპერაცია გაიკეთა, საქართველოში ორშაბათს, 20 თებერვალს დაბრუნდება.

2017 წლის 10 თებერვალს, პროკურატურამ დეკანოზი გიორგი მამალაძე დააკავა. უწყების მტკიცებით, გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ. პროკურატურის განცხადებით, უცნობმა პირმა მიმართა პროკურატურას და მიუთითა, რომ მამალაძეს უნდა მოეხდინა მაღალი იერარქიის სასულიერო პირის სიცოცხლის ხელყოფა.

გაიგეთ მეტი: ცანიდის საქმე