საქართველოს პრეზიდენტმა პარლამენტში სიტყვით გამოსვლისას პანდემიაზე ისაუბრა და პოლიტიკური პარტიების ერთობლივი ძალისხმევის მნიშვნელობას გაუსვა ხაზი. კერძოდ, მან აღნიშნა, რომ პანდემიის დამარცხება რომელიმე ხელისუფლების ან პარტიის მიღწევა ვერ იქნება და არც მასთან ბრძოლისას შეიძლება ნიშნისმოგებით საუბარი.

"უპროცენდენტო გამოწვევის წინაშე დგას საქართველოს ჯანდაცვა, ისევე, როგორც მთელი მსოფლიო და ეს არის პანდემია. თუ ვინმე ფიქრობს, რომ ამ მასშტაბის კატასტროფას მარტო გაუმკლავდება ან რომელიმე პოლიტიკური ძალას სხვისი მარცხით გამარჯვებული დარჩება, ეს იმას ნიშნავს, რომ ამ ვითარებისა არაფერი გვესმის და არც ეროვნული პასუხისმგებლობის განცდა გაგვაჩნია. ხომ უნდა ვხვდებოდეთ, რომ ახლა ნიშნის მოგების დრო აღარ არის. ან ერთად გადავრჩებით, ან ვერა".

ზურაბიშვილმა საუბრისას რამდენჯერმე გაუსვა ხაზი ოპოზიციისა და ხელისუფლების საერთო პასუხისმგებლობას.

"უნდა გვესმოდეს, რომ დაავადებაზე დროული გამარჯვება ვერ და არ ჩაითვლება რომელიმე ხელისუფლების, ან პარტიის გამარჯვებად. ეს უნდა იყოს საზოგადოების გამარჯვება, რომელიც მიიღწევა მხოლოდ ერთიანი და პასუხისმგებლიანი მიდგომით. ასეთი მიდგომის მაგალითი გვაჩვენა ისრაელმა, ამ პატარა ქვეყანამ, რომელმაც მთლიანობაში კარგად გაიაზრა, რომ სოლიდარობა და ერთიანობა განაპირობებს ეკონომიკის გადარჩენასა და თითოეული ოჯახის ხვალინდელ კეთილდღეობას.

მიმაჩნია, რომ ერთიანობისკენ გადადგმული პირველი ნაბიჯი არსებული რეგულაციების ყველაზე ერთნაირად გავრცელებაა", — განაცხადა მან.

გარდა ამისა, ზურაბიშვილმა გააკრიტიკა უცხოეთში მოღვაწე ექიმები კრიტიკული მესიჯების გამო. მისი აზრით, ექიმები ისინი უნობლობას და უიმედობას თესავენ.

"აქ საჭიროა პოზიციების და რჩევების, ცოდნისა და გამოცდილების შეჯერება. ასეთ დროს კი, სრულიად მიუღებლად მიმაჩნია, როცა ყოველგვარი ჰუმანურობისა თუ თანაგრძნობის გარეშე, უცხოეთში მოღვაწე ზოგიერთი ქართველი ქვეყნის სტრატეგიას მხოლოდ აკრიტიკებეს, არაფერს სთავაზობს და ამით თესავს უნდობლობას და უიმედობას", — განაცხადა მან.

პრეზიდენტმა ანტივაქსერებიც გააკრიტიკა და ვაქცინაციის მნიშვნელობაზე ისაუბრა. მან აღნიშნა, რომ საჭიროა გონიერება და არა ემოციური გადაწყვეტილების მიღება, რადგან ვაქცინის სიკეთე საფრთხეზე ბევრად დიდია.