დაავადებათ კონტროლის ეროვნული ცენტრის ხელმძღვანელის, ამირან გამყრელიძის განცხადებით, შშმ პირების ვაქცინაციის საკითხს საკოორდინაციო საბჭო ამ დღეებში განიხილავს.

"მალე დადგება შშმ პირების ვაქცინაციის საკითხი. საბჭო ამ დღეებში განიხილავს ე.წ. დამატებითი კონტინგენტის ჩართვის საკითხს და, მათ შორის, განხილული იქნება ეს [შშმ პირების] საკითხიც. ვაქცინების დეფიციტის გამო ამ ეტაპზე შეიძლება სრულად ვერ დაიფაროს, რადგან, როგორც მახსოვს, ქვეყანაში 300 000-მდე შშმ პირია. ეს საკითხი დგას და ჩვენ შევეცდებით, მაქსიმალური კომფორტი შევუქმნათ, მობილურ ბრიგადებზეა საუბარი, დახმარებაში ტრანსპორტირებაში ვაქცინაციის ცენტრებთან და ა.შ.

რაც შეეხება ტესტირებას, ამ საკითხსაც დავაყენებთ საბჭოზე, რომ ამ ადამიანებს მეტი ხელმისაწვდომობა მივცეთ ტესტირებაზე. მით უმეტეს, მესამე ტალღის პერიოდში, თუ ის იქნება, ტესტირება უფრო და უფრო უნდა გაფართოვდეს", — განაცხადა გამყრელიძემ დღის კურიერში.