მოგზაურობის ერთ-ერთი ყველაზე დიდი დისკომფორტი უქსელო და უინტერნეტო მობილურია. თუ უცხო ქვეყანას 4-5 დღეზე მეტი ხნით სტუმრობთ, როუმინგის გამოყენება საკმაოდ ძვირი სიამოვნებაა, ხოლო ადგილობრივი ოპერატორის სიმის აღება ასევე ხარჯთანაა დაკავშირებული.

ინდოეთმა გადაწყვიტა, რომ იქ ჩასულ ტურისტებს მთლიანად მოუხსნას ეს დისკომფორტი.

ინდოეთის ტურ-ოპერატორთა ასოციაციამ (IATO) ახალი პროექტი წამოიწყო, რომლის ფარგლებშიც ყველა ტურისტს, რომელიც ელექტრონული ვიზით სარგებლობს, სახელმწიფოს მფლობელობაში არსებული ოპერატორის (BSNL) სიმ-ბარათი უფასოდ გადაეცემა.

სიმ-ბარათის მისაღებად სტუმარმა პასპორტ-კონტროლზე ელექტრონული ვიზის ასლი და პასპორტი უნდა წარმოადგინოს.

ტურისტებისთვის გადაცემულ ნომერზე წინასწარ ჩატვირთული იქნება 50 რუპიის (85 ცენტი) ღირებულების სასაუბრო დრო და 50 მეგაბაიტი ინტერნეტი, რაც სრულიად საკმარისია პირველ რამდენიმე საათში გზის გასაკვლევად და საორგანიზაციო საკითხების მოსაგვარებლად. დამატებითი სასაუბრო დროისა და მობილური ინტერნეტის შეძენა ამის შემდეგ თავად მოგიწევთ.

ინდოეთის ელექტრონული ვიზა 150 ქვეყანაში გაიცემა, მათ შორის საქართველოშიც. განაცხადის შევსება ინდოეთის e-visa-ზე აქ შეგიძლიათ.

პროექტი ჯერჯერობით მხოლოდ ერთ აეროპორტში მოქმედებს, მაგრამ IATO-ს განცხადებით, ეს პრაქტიკა ქვეყნის დანარჩენ 15 აეროპორტშიც მალე დაინერგება.