განათლებისა და მეცნიერების მინისტრის მოადგილის ეკატერინე დგებუაძის განცხადებით, ბოლო ერთი კვირის მონაცემებით, კორონავირუსი მასწავლებელთა და სკოლის ადმინისტრაციის წარმომადგენელთა 0,1%-სა და მოსწავლეთა 0,02%-ს დაუდასტურდა.

დგებუაძის ინფორმაციით, 2 085 საჯარო სკოლიდან, სრულ დისტანციურ სწავლებაზე 52 საჯარო სკოლა და 121 ცალკეული კლასი იმყოფება. ხოლო 218 კერძო სკოლიდან დისტანციურ სწავლებაზე 2 სკოლა და 17 ცალკეული კლასია.

"Covid-19-ის გავრცელების სხვადასხვა პარამეტრი სკოლებში ოდნავ გაზრდილია, რაც ძალიან საყურადღებოა. როგორც აქამდე ხდებოდა, ვირუსის გამოვლენის შემთხვევებში სკოლებზე კვლავ წერტილოვანი შეზღუდვები გაგრძელდება და სკოლები ჯანდაცვის სამინისტროს პროტოკოლის შესაბამისად იმოქმედებენ", — განაცხადა ეკატერინე დგებუაძემ ბრიფინგზე.

მინისტრის მოადგილის თქმით, სწავლის განახლებიდან დღემდე, კვირიდან კვირამდე ინფექციის გავრცელების პროცენტულ მაჩვენებლებს შორის სხვაობა მინიმალური იყო და 0,1%-ს არ სცდებოდა. თუმცა, დგებუაძის ცნობით, მიმდინარე კვირის მონაცემებით, სხვადასხვა პარამეტრი ოდნავ გაზრდილია, რაც ძალიან საყურადღებოა.

2 აპრილის მონაცემებით, საქართველოში კორონავირუსის 529 ახალი შემთხვევა დადასტურდა, გამოჯანმრთელდა 326, ხოლო გარდაიცვალა — 13 ადამიანი.

ბოლო 24 საათში ქვეყნის მასშტაბით ჩატარდა 24 646 კვლევა ტესტით, მათ შორის ანტიგენის სწრაფი ტესტით — 14 659, PCR-ით — 9 987.

Stopcov.ge-ზე გამოქვეყნებული ინფორმაციის თანახმად, დადებითობის დღიური მაჩვენებელი არის 2,15%, ბოლო 14 დღის განმავლობაში — 1,8%, ხოლო 7 დღის — 1,73%.