იტალიელ განგსტერს კულინარიულმა მისწრაფებამ ციხის საკანში ამოაყოფინა თავი.

იტალიურმა პოლიციამ გავლენიანი მაფიის წევრის, 53 წლის მარკ ფერენ კლოდ ბიარტის კვალს, რომელსაც შვიდი წლის განმავლობაში ეძებდნენ, YouTube-ზე მიაგნო.

BBC-ის ინფორმაციით, 2014 წლიდან ძებნილი დამნაშავე ინტერნეტში კულინარიულ ვიდეოებს აქვეყნებდა: იტალიური კერძების ტრადიციულ რეცეპტებს უზიარებდა მაყურებელს. მართალია, გამოქვეყნებულ კადრებში ის თავის სახეს არ აჩენდა, მაგრამ ვიდეოებში კარგად ჩანდა ხელები და მათზე ამოსვირინგებული ტატუები, რომლითაც მისი ვინაობის დადგენა მოახერხეს.

მარკ ბიარტი მარტში დააპატიმრეს კარიბის ზღვაში მდებარე დომინიკელთა რესპუბლიკაში, სადაც ბოლო წლები იმალებოდა და მშვიდად ცხოვრობდა.

ის უკვე გადაიყვანეს იტალიაში მართლმსაჯულებისთვის წარსადგენად.

აღნიშნული განგსტერი ცნობილი იტალიური მაფიის Ndrangheta (ნდრანგეტა) წევრია, რომელიც მსოფლიოში ერთ-ერთ ყველაზე გავლენიანი კრიმინალური ორგანიზაციაა, რადგან სწორედ ის აკონტროლებს ევროპაში კოკაინის ყველაზე დიდი მარაგის დისტრიბუციას.

ბოლო წლებში იტალიელმა სამართალდამცავებმა სწორედ ამ ძველ და ძლევამოსილ გაერთიანებას განსაკუთრებული ბრძოლა გამოუცხადეს: 2021 წელს დაიწყო სასამართლო განხილვები 355 ბრალდებულის წინააღმდეგ, რომლებიც მათთან კორუფციული ან სხვა სახის გარიგებაში არიან ბრალდებულნი.

სასამართლო პროცესი საქმის მასშტაბურობიდან გამომდინარე (900 მოწმეზე მეტი დაიკითხება) მინიმუმ ორ წელიწადს გაგრძელდება.