ქართული ოცნების წევრის, შალვა პაპუაშვილის განცხადებით, დღეს მოლაპარაკებების დასრულების შემდეგ, შვიდი ოპონენტი იყო წარმოდგენილი და შვიდივესგან "ტყუილები" მოისმინეს. ამის შესახებ მან ჟურნალისტებთან ისაუბრა.

"ჩვენც ვნახეთ ეს დოკუმენტი, რომ არ არის საუბარი არც რიგგარეშე არჩევნებზე, არც პლებისციტზე და რაიმე ამის მაგვარზე. ამას გარდა, შეხვედრის დროს ხაზგასმით იქნა აღნიშნული, რომ არ არსებობს ფრაიმე კითხვის ნიშანი ამ არჩევნების ლეგიტიმურობასთან დაკავშირებით.

ამიტომაც არის, რომ ჩვენი ოპონენტები არიან გაბრაზებულები, შეიძლება ასეც ითქვას და რამდენიმე მათგანმა, შევატყვეთ, რომ დაიწყო დიკსრედიტაციის კამპანია ბატონი დანიელსონის და მიშელის წინააღმდეგ", — თქვა მან.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.