ევროპული საბჭოს პრეზიდენტის, შარლმ მიშელის წარმომადგენელმა, კრისტიან დანიელსონმა ხელისუფლებასა და ოპოზიციას შორის მორიგი წარუმატებელი მოლაპარაკებების შემდეგ განცხადა, რომ ევროპულ მისწრაფებებს კომპრომისები სჭირდება, განსაკუთრებით კი იმ პარტიისგან, რომელიც ხელისუფლებაშია. მისივე თქმით, კომპრომისი ეს არის სიძლიერის და არა სისუსტის ნიშანლი.

"სართველოს დასავლელი პარტნიორები არ არიან აქ იმისთვის, რომ პარტიებს თავს თავიანთი გადაწყვეტილებები მოახვიონ. ეს არ არის მეთოდები, რომელსაც ევროკავშირი იყენებს. ჩვენი მეთოდი მედიაციაა. ასე რომ, საქართველოს ლიდერები უნდა წავიდნენ კომპრომისზე და გაუმკლავდნენ ამ გამოწვევას.

როგორც უკვე ვთქვი, კომპრომისი ეს არის სიძლიერე და არა სისუსტე. ევროპულ მისწრაფებებს სჭირდება კომპრომისები, განსაკუთრებით იმ პარტიისგან, რომელიც ხელისუფლებაშია, იმისთვის, რომ ქვეყანა კრიზისიდან გამოვიდეს. დიდ ამბიციებზე დიდი პასუხისმგებლობა მოდის და სამწუხაროდ, მაგიდასთან არ ყოფილა ასეთი მზაობა, რომ მიღწეული ყოფილიყო კომპრომისი", — განაცხადა დანიელსონმა.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

გაიგეთ მეტი:

რა ეწერა დოკუმენტში, რომელსაც მხარეებმა ხელი არ მოაწერეს