თორნიკე ყიფიანი ევროვიზიის ნახევარფინალში მე-10 ნომრად წარდგება

2021 წლის ევროვიზიის სიმღერის კონკურსამდე სულ რაღაც 49 დღე რჩება. სანამ როტერდამში ჯერ კიდევ წინასაკონკურსო სამზადისი მიმდინარეობს, უკვე ცნობილია რიგითობა, რომლითაც ღონისძიების 33 მონაწილე ქვეყანა ორ ნახევარფინალში გადანაწილდა.

საქართველოს წარმომადგენელი, თორნიკე ყიფიანი 20 მაისს, მეორე ნახევარფინალში წარდგება მაყურებლის წინაშე მე-10 ნომრად.

ქვეყნების რიგითობა შეგიძლიათ ქვემოთ იხილოთ:

თითოეული ნახევარფინალიდან ფინალში 10-10 მონაწილე ქვეყანა გადავა. მათთან ერთად 22 მაისის გრანდიოზულ ფინალური შოუში ვიხილავთ ეგრეთ წოდებული დიდი ხუთეულის ქვეყნებს (გაერთიანებული სამეფო, საფრანგეთი, გერმანია, იტალია, ესპანეთი) და მასპინძელს — ნიდერლანდებს.

შეგახსენებთ, რომ გასულ წელს ევროვიზია თავისი არსებობის 65-წლიანი ისტორიის განმავლობაში პირველად არ გაიმართა კორონავირუსის პანდემიის გამო. მიუხედავად ამისა, წლევანდელ ღონისძიებას ბოლო ევროვიზიის — 2019 წლის კონკურსის — გამარჯვებული ქვეყანა, ნიდერლანდები უმასპინძლებს.

ჯერჯერობით დაუზუსტებელია, რა ფორმატით ჩატარდება მასშტაბური მუსიკალური კონკურსი წელს. მიუხედავად ამისა, ორგანიზატორები ბევრ სიურპრიზს და დაუვიწყარ შოუს გვპირდებიან.

2021 წლის ევროვიზიის სიმღერის კონკურსში თავდაპირველად 41 ქვეყანას უნდა მიეღო მონაწილეობა, თუმცა, შიდასაორგანიზაციო საკითხების დროულად მოუგვარებლობის გამო კონკურსზე უარი ჯერ სომხეთმა თქვა, შემდეგ კი ბელარუსმა მიიღო დისკვალიფიკაცია პოლიტიკური კონტექსტის მქონე სიმღერისთვის.

65-ე ევროვიზიის სიმღერის კონკურსს თან ახლდა ხმაური რამდენიმე სხვა ქვეყანაშიც. კვიპროსში საზოგადოების ნაწილი და ეკლესია კვლავ აპროტესტებს ქვეყნის სახელით "არაქრისტიანული სიმღერის" მონაწილეობას.

კონკურსის და მისი ფანებისადმი შეურაცხმყოფელი დამოკიდებულების გამო ქართველი და უცხოელი გულშემატკივრები საქართველოს წარმომადგენლის მოხსნასაც ითხოვდნენ წლევანდელი ღონისძიებიდან. თუმცა, რადგან საქართველოს საზოგადოებრივი მაუწყებლის პოზიციის გაგება არაერთი მცდელობის მიუხედავად ვერ მოვახერხეთ, მხოლოდ დღეს, რიგითობის გამოცხადებით გახდა ცნობილი, რომ თორნიკე ყიფიანი კვლავ მიიღებს მონაწილეობას 2021 წლის ევროვიზიაზე.