ჯანდაცვის მინისტრის, ეკატერინე ტიკარაძის განცხადებით, შემდეგი კვირიდან საქართველო ჩინური ვაქცინის 100 ათას დოზას მიიღებს. ამის შესახებ მან საკოორდინაციო საბჭოს წევრების ბრიფინგზე ისაუბრა.

"რაც შეეხება დამატებით ვაქცინებს, კვირის ბოლოს ჩვენ ველოდებით ჩინეთიდან ვაქცინის ჩამოტანას, რომელიც უნდა გამოიგზავნოს კვირის ბოლოს, შესაბამისად, შემდეგ კვირაში ჩვენ გვექნება დამატებით ჩინური ვაქცინა, რომელიც ასევე არის აღიარებული მკაცრი მარეგულირებლის მხრიდან [უნგრეთის მხრიდან]. 100 ათასი დოზა იქნება ჩამოტანილი ჩინეთიდან", — განაცხადა მან.

დაავადებათა კონტროლის ცენტრი დირექტორის, ამირან გამყრელიძის განცხადებით კი, ჩინური ვაქცინა ჯანმრთელობის მსოფლიო ორგანიზაციის აღიარებს მალე მიიღებს.

"საქართველოს კანონმდებლობაში არის მუხლი, რომ საქართველოს შემოაქვს აღიარებითი რეჟიმის [ვაქცინები] და ეს ვრცელდება მკაცრ მარეგულირებლებზე, რომელშიც შედის ევროკავშირის ქვეყნების მარეგულირებლები, მათ შორის, უნგრეთის. ამიტომ ქვეყანაში [ჩინური] ვაქცინის შემოტანა შესაძლებელია და მე დიდი იმედი მაქვს, მას მალე ექნება ჯანმრთელობის მსოფლიო ორგანიზაციის აღიარება", — განაცხადა გამყრელიძემ.

მისივე თქმით, გუშინ, 29 მარტს სამინისტროში Novavax-ის ვაქცინის შესაძენად კონტრაქტი მოვიდა. გამყრელიძის თქმით, მოლაპარაკებები Novavax-ის მილიონი დოზის შესყიდვაზე.

გამყრელიძემ, ასევე, თქვა, რომ Novavax-ის გარდა საქართველო მოლაპარაკებებს ფაიზერთან აწარმოებს უკვე არა კოვაქსის გავლით, არამედ პირდაპირ ფაიზერიდან შესყიდვაზე. NCDC-ის დირექტორი, აგრეთვე, ამბობს, რომ მიმდინარეობს პირველი მოლაპარაკებები ჯონსონ ენდ ჯონსონთანაც.

Pfizer-ის ვაქცინის 29 250 დოზა საქართველოში 25 მარტს გამთენიისას ჩამოიტანეს. ამიერიდან, მოქალაქეებს კორონავირუსის საწინააღმდეგო აცრის ჩატარება ორი, AstraZeneca-სა და Pfizer-ს შორის არჩევანის გაკეთებით შეეძლებათ.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო, ხოლო ვაქცინაციის პროცესში 65 წელს ზევით მოქალაქეები 25 მარტიდან ჩაერთნენ.

მინისტრის მოადგილე, თამარ გაბუნიამ კი არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.