მოანა 2017 წლის ოსკარზე ნომინირებული ანიმაციური ფილმია. ეს არის ზღაპარი გოგონაზე, რომელსაც წინაპრებმა უხმეს საკუთარი კუნძულის გადასარჩენად, თუმცა მოანა არ არის ერთადერთი, ვისაც საგმირო საქმეების ჩადენა შეუძლია. მასთან ერთად ვხვდებით მაუის, რომელიც ნახევარღმერთია და მამაც გოგონას დაბრკოლებების გადალახვაში ეხმარება.

მოანას არ აქვს განსაცვიფრებელი სიუჟეტი, თუმცა მასში, ისევე როგორც სხვა მულტფილმებში, ისეთ მნიშვნელოვან საკითხებზეა ყურადღება გამახვილებული, როგორებიცაა: შეუპოვრობა, სიახლის ძიება, ერთგულება და სიკეთე.

ჯადოსნურობა

მოანაში განსაკუთრებით თვალშისაცემია ვიზუალური მრავალფეროვნება. მაყურებელი პირველივე კადრებიდან ჯადოსნურ სამყაროში გადადის და კუნძულის გარემოში ეფლობა. იუმორის გარეშე დისნეის მულტფილმი წარმოუდგენელია და მოანა ამ მხრივაც არაა გამონაკლისი. სახალისო დიალოგებით გაჯერებული სცენები ერთი წამითაც არ მოგაწყენთ.

ყურადღებას იქცევს მაუის მოძრავი ტატუებიც, რომლებიც საჭირო დროსა და ადგილას მნიშვნელოვან მინიშნებებს აძლევენ პერსონაჟებს. ოკეანე კი საერთოდაც დამოუკიდებელი პერსონაჟია. ბუნებასთან გმირების კავშირი მუდმივად იგრძნობა.

მუსიკა

დისნეის მულტფილმებში მუსიკას მნიშვნელოვანი ნაწილი უჭირავს. მოანას შემთხვევაში ანიმაციურ კომპანიას სურდა, წყნარი ოკეანის კუნძულების ფოლკლორული რიტმი და ბროდვეის ესთეტიკა გაეერთიანებინა. კომპოზიტორებმა გადაწყვიტეს, ჟღერადობისთვის მრავალფეროვანი საკრავები გამოეყენებინათ, მათ შორის: გიტარა და სიმები, პოლინეზიური ვოკალი, ბამბუკის საკრავები და დასარტყამი ინსტრუმენტები.

მოანას მთავარი საუნდტრეკი How Far I’ll Go წელს ოსკარზეა წარდგენილი საუკეთესო სიმღერის კატეგორიაში. I’m Moana და We Know the Way დისნეისთვის დამახასიათებელი სტრუქტურის მქონე კომპოზიციებია, ხოლო You are Welcome და Shiny ერთი სტილის სიმღერებია: ორივე მათგანი განსხვავებული ტემპით იწყება და მისამღერის დროს სრულიად იცვლება რიტმი.

დისნეის ტრადიციული ხელწერა და განსხვავებული მუსიკა - თუ ეს სინთეზი თქვენთვის საინტერესოა, მაშინ მოანას ისტორიაც მოგეწონებათ.