ბაკურიანში აფეთქების შედეგად შუახნის კაცი დაშავდა. როგორც დაშავებულის შვილმა სამხრეთის კარიბჭესთან განაცხადა, აფეთქება 26 მარტს დილის საათებში მაშინ მოხდა, როცა მამამისი მანქანის საბარგულიდან ნივთის ამოღებას ცდილობდა. ადგილობრივი მედიის ცნობით, შედეგად, 53 წლის კაცმა, ზედა კიდურებისა და თვალის არეში მსუბუქი სახის დამწვრობა მიიღო.

"საბარგულში იდო ბოთლი, რომელიც ფიცარზე იყო დამაგრებული. მამამ როდესაც ბოთლი აიღო აფეთქდა, ხელი და თვალი აქვს დაზიანებული. რაღაცა იდო, არ ვიცი ზუსტად რა აფეთქდა. ამჟამად თავს კარგად გრძნობს, არ აქვს მძიმე დაზიანება, თუმცა ბორჯომის კლინიკაში აპირებს წასვლას თვალის დაზიანების სანახავად", — უთხრა დაშავებულის შვილმა სამხრეთის კარიბჭეს.

მათივე ინფორმაციით, ამჟამად დაშავებული მკურნალობას ბაკურიანის კლინიკაში გადის.

შინაგან საქმეთა სამინისტროში On.ge-ს განუცხადეს, მომხდარზე გამოძიება სისხლის სამართლის კოდექსის 229–ე მუხლით დაიწყო, რაც აფეთქების შედეგად ნივთის დაზიანებას გულისხმობს, რამაც სხეულის ან ქონების დაზიანება გამოიწვია.