ახალი ზელანდიის საკანონმდებლო ორგანოს ინიციატივით, მალე ძალაში შევა კანონი, რომლის მიხედვითაც, ორსულობის შეწყვეტისა ან მკვდრადშობადობის შემთხვევაში, მშობლებს 3-დღიანი ანაზღაურებადი შვებულება მიეცემათ. ეს წესი იმ მშობლებზეც ვრცელდება, რომლებიც ბავშვის ყოლას სუროგაციის ან შვილად აყვანის გზით გეგმავდნენ.

საკანონმდებლო ინიციატივის ავტორის, ჯინი ანდერსონის მიხედვით, ეს იქნება მძიმე დანაკარგის გამო გაცემული ანაზღაურებადი შვებულება და მგლოვიარე მშობლებს არ მოუწევთ, შვებულება ავადმყოფობის მიზეზით მოითხოვონ. აღსანიშნავია, რომ 3-დღიანი შვებულება აბორტზე არ ვრცელდება.

"მწუხარება, რომელიც ნაყოფის დაკარგვას მოსდევს, არაა ავადმყოფობა, ის დანაკარგითაა გამოწვეული. ამის გავლას დრო სჭირდება. ფიზიკურად და მენტალურად გამომჯობინებისთვის დრო აუცილებელია", — ამბობს კანონპროექტის ინიციატორი.

ახალი ზელანდია პირველი ქვეყანა არაა მსგავსი ინიციატივით. მაგალითად, ინდოეთში მსგავსი შემთხვევებისთვის 6-კვირიანი შვებულებაა გათვალისწინებული, თუმცა რადგანაც მოსახლეობის დიდი ნაწილი არაფორმალურ სექტორშია დასაქმებული, ამ უფლებით სარგებლობა შეზღუდულია.