ინფექციური საავადმყოფოს დირექტორის, თენგიზ ცერცვაძის განცხადებით, საჭიროა ხვალიდანვე დავიკაპიწოთ ხელები და გაკეთდეს ყველაფერი, რომ ჩავებათ ვაქცინაციის ფართომასშტაბიან კამპანიაში.

"მე მინდა ამ შემთხვევაში დავესესხო ჩვენი ყოფილი ლიდერისა და მსოფლიოში ცნობილი პიროვნების, ედუარდ შევარდნაძის გამონათქვამს, დღეს მაინც და მაინც პოპულარული არ არის ეს პიროვნება საქართველოში, მაგრამ ის დიდი პიროვნება იყო მაინც ისტორიისთვის. საქართველოში როცა ჩამოვიდა, თქვა ასეთი ფრაზა, რომ ნუ მიყურებთ მე. მე ვერ მოგიტანთ თქვენ პროგრესსა და ბედნიერებას, უნდა დავიკაპიწოთ ხელები და ერთად ავაშენოთ საქართველო. ეს შემიძლია ვთქვა, ხვალიდანვე უნდა დავიკაპიწოთ ხელები და უნდა გავაკეთოთ ყველაფერი, რომ ჩავებათ ფართომასშტაბიანი ვაქცინაციის კამპანიაში", — განაცხადა თენგიზ ცერცვაძემ რუსთავი 2-ის ეთერში.

NDI-ს კვლევის თანახმად, გამოკითხულთა 53 პროცენტი კორონავირუსის წინააღმდეგ ვაქცინის გაკეთებას არ აპირებს. ამასთან, აცრის გაკეთებაზე თანახმაა მხოლოდ 35 პროცენტი, ხოლო 12-მა პროცენტმა არ იცის.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო. ჯანდაცვის მინისტრის, ეკატერინე ტიკარაძის განცხადებით, ვაქცინაციის პროცესში 65 წელს ზევით მოქალაქეებიც 25 მარტიდან ჩაერთვებიან.

მინისტრის მოადგილე, თამარ გაბუნიამ კი არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.