ფინანსურმა პოლიციამ კორონავირუსზე ყალბი PCR ტესტის უარყოფითი პასუხის დამზადების ბრალდებით ერთი პირი დააკავა.

გამოძიების ინფორმაციით, ბრალდებულმა ორ პირის იმერეთის რეგიონში მდებარე ერთ-ერთი სამედიცინო დაწესებულების სახელით, შესაბამისი ლაბორატორიული კვლევის გარეშე, 200 ლარის სანაცვლოდ, დაუმზადა და გადასცა ახალი კორონავირუსის PCR ლაბორატორიული კვლევის უარყოფითი შედეგების ამსახველი დოკუმენტები.

როგორც უწყებაში აცხადებენ, ამოღებულია დიდი ოდენობით, წინასწარ ხელმოწერილი და ბეჭდით დამოწმებული შეუვსებელი თაბახის ფურცლები.

გამოძიება მიმდინარეობს საქართველოს სისხლის სამართლის კოდექსის 362-ე მუხლის პირველი და 221-ე მუხლის მე-4 ნაწილებით, რაც ყალბი დოკუმენტების დამზადებას და კომერციულ მოსყიდვას გულისხმობს. სასჯელის სახით ითვალისწინებს თავისუფლების აღკვეთას 4-დან 6 წლამდე ვადით.