პროფკავშირების ახალგაზრდული მოძრაობის ცნობით, ბოლტის კურიერები მეორედ გაიფიცნენ. მათივე ინფორმაციით, 24 მარტს 13:00 საათზე, ბოლტ ფუდის კურიერები, სპორტის სასახლესთან, მასშტაბურ აქციას გამართავენ.

პროფკავშირში მიზეზად კომპანიის მხრიდან პირველი გაფიცვის დროს დადებული პირობის დარღვევას ასახელებენ, რამაც, მათი თქმით, საბონუსე სისტემა კიდევ უფრო გააუარესა.

"დღეს კომპანიამ პროტესტის მონაწილეების სამსახურიდან გათავისუფლება (დაბლოკვა) და ახალი კურიერების მიღება დაიწყო", — წერია პროფკავშირების ახალგაზრდული მოძრაობის განცხადებაში.

ისინი კურიერების 6 მოთხოვნას, ესტონელ დამსაქმებლებთან გააგზავნიან. ესენია:

  • გადაიხედოს საბონუსე სიტემა;
  • დღიური ბონუსის ასაღებად განსაზღვრული შეკვეთების რაოდენობა არ აღემატებოდეს დღიურად შესრულებადი, რეალური შეკვეთების რიცხვს;
  • ობიექტამდე მისასვლელი მანძილი გახდეს ანაზღაურებადი;
  • კურიერს აუნაზღაურდეს არა მხოლოდ ობიექტიდან მომხმარებლამდე განვლილი მანძილი, არამედ ობიექტამდე მისვლის საფასურიც;
  • კურიერს აუნაზღაურდეს გაცდენილი დროის საფასური;
  • იმ შემთხვევაშიც კი, თუკი ხაზზე მყოფ კურიერს ერთი საათის განმავლობაში არ შეუვა შეკვეთა, ეს დრო კომპანიამ აანაზღაუროს;
  • განისაზღვროს ცუდი შეფასების კრიტერიუმები;
  • მკაცრად განისაზღვროს, თუ რა შემთხვევებში შეიძლება, კურიერმა მიიღოს ცუდი შეფასება და შეეზღუდოს პროგრამასთან წვდომა;
  • კომპანიამ დაასაბუთოს ცუდი შეფასების მიზეზი და კურიერი პროგრამის გათიშვის შესახებ წინასწარ გააფრთხილოს;
  • მოხდეს ბონუსების მომენტალური დარიცხვა;
  • კომპანიის მიერ დადგენილი ბონუსები მომენტალურად აისახოს ანგარიშზე;
  • პროგრამაში დაემატოს ე.წ. თიფი;
  • მომხმარებელს ჰქონდეს საშუალება, პროგრამის მეშვეობით კურიერს გადაუხადოს დამატებით ფეხის ქირა ე.წ. თიფი.

On.ge აღნიშნულზე ბოლტი ფუდის პრესსამსახურთან სცადა დაკავშირება. მათ პასუხს მიღებისთანავე შემოგთავაზებთ.