ჯანდაცვის მინისტრის, ეკატერინე ტიკარაძის განცხადებით, ექსპრემიერმინისტრის, გიორგი გახარიას პოლიტიკაში დაბრუნების შესახებ მედიიდან გაიგო. კითხვაზე, ეს გახარიას "დამოუკიდებელი თამაში" იქნება, თუ არა, ის პასუხობს, რომ არ იცის.

"ჩემთვის ეს ფაქტი გახდა ცნობილი მედიასაშუალებებიდან. დაველოდოთ განვითარებულ მოვლენებს", — განაცხადა მან.

გადადგომიდან ერთი თვის შემდეგ, გიორგი გახარია პირველად 22 მარტს გამოჩნდა ჟურნალისტებთან, უფრო სწორად, პირველად მისცა მათ კომენტარი და თქვა, რომ არსად წასვლას არ აპირებს და პოლიტიკაში რჩება. რამდენიმე საათში იმავე შინაარსის წარწერით მან ოფიციალურ ფეისბუქგვერდზე ფოტო გამოაქვეყნა.

იმავე საღამოს კი მან ტვიტერზე დაპოსტა, რომ პოლიტიკური დღისწესრიგის შექმნაზე მუშაობს.

გახარიას განცხადებას პოლიტიკურ წრეებში განხილვა მოჰყვა. ოპოზიციის ნაწილი მას ბიძინა ივანიშვილის დაანონსებულ ოპოზიციურ ძალად აღიქვამს და აცხადებენ, რომ ის "ქართული ოცნება 2"-ს ჩამოაყალიბებს. ნაწილი ფიქრობს, რომ ეს მმართველ გუნდს დაასუსტებს. ყოფილი თანაგუნდელები კი ამბობენ, რომ მის პოლიტიკაში დაბრუნებას მიესალმებიან.

გახარიამ პრემიერმინისტრის თანამდებობა 18 თებერვალს დატოვა და ამის მიზეზად ნაციონალური მოძრაბის თავმჯდომარის, ნიკა მელიას საქმეზე ქართული ოცნების გუნდში აზრთა სხვადასხვაობა დაასახელა.