ჯანდაცვის მინისტრის, ეკატერინე ტიკარაძის განცხადებით, ვაქცინაციის საინფორმაციო კამპანიის მოდიფიცირებაზე მუშობენ. მისი თქმით, აქამდე საერთაშორისო პარტნიორებთან ერთად დაგეგმილი კამპანია ჰქონდათ, თუმცა ახალციხეში ექთნის გარდაცვალებამ გავლენა იქონია და რამდენიმე დღეში ექნებათ მითითებები, როგორ უნდა გაგრძელდეს ეს პროცესი.

"იმ ფაქტმა, რომელიც მოხდა ახალციხეში, რა თქმა უნდა, იქონია მნიშვნელოვანი გავლენა ამ პროცესთან მიმართებაში. დღესდღეობით მიმდინარეობს მოდიფიცირება სტრატეგიული კამპანიის, რომელიც იყო დღემდე დაგეგმილი. რამდენიმე დღეში ჩვენ გვექნება უკვე სურათი და მითითებები, როგორ უნდა გაგრძელდეს ეს პროცესი და შესაბამისად გაგრძელდება", — განაცხადა მან, როცა NDI-ს კვლევის მონაცემებზე დასმულ კითხვას პასუხობდა.

NDI-ს კვლევის თანახმად, გამოკითხულთა 53 პროცენტი კორონავირუსის წინააღმდეგ ვაქცინის გაკეთებას არ აპირებს. ამასთან, აცრის გაკეთებაზე თანახმაა მხოლოდ 35 პროცენტი, ხოლო 12-მა პროცენტმა არ იცის.

მას შემდეგ, რაც ახალციხელი ექთანი გარდაიცვალა, მედიკოსები ვაქცინაციაზე უარს ამბობენ. ვრცელდება ინფორმაცია, რომ ის ექიმებიც კი, ვისაც დაჯავშნილი ჰქონდა ვაქცინის რიგი, უარს ამბობენ AstraZeneca-თი აცრაზე. მიზეზად კი იმას ასახელებენ, რომ მათი კოლეგა ვაქცინაციის შემდეგ, სავარაუდოდ, ანაფილაქსიური შოკით გარდაიცვალა.