საქართველოს იურისტთან ასოციაცია მოძრაობა ხალხისთვის ლიდერს, ანა დოლიძეს მხარდაჭერას უცხადებს და პირადი ცხოვრების უკანონო ხელყოფას გმობს. როგორც ორგანიზაციაში აცხადებენ, საქართველოში ფარული მიყურადებით მოპოვებული პირადი ცხოვრების ამსახველი კადრების გამოქვეყნების მძიმე გამოცდილება არსებობს, რაც ეფექტიან გამოძიებას მოითხოვს.

"ამგვარი ხერხებით ბრძოლის ადრესატები უმეტესწილად არიან პოლიტიკოსი და ჟურნალისტი ქალები, რათა პირადი ცხოვრების კადრებით შანტაჟისა თუ გამოქვეყნების შემდეგ მოხდეს მათი პოლიტიკური თუ ჟურნალისტური საქმიანობიდან ჩამოშორება", — აღნიშნულია საია-ს განცხადებაში.

საია მოუწოდებს შესაბამის საგამოძიებო ორგანოებს გადაცემა პოსტ ფაქტუმში გასული ინფორმაციის ნამდვილობის და შესაბამისი რეაგირების მიზნით დროულად დაიწყოს გამოძიება. ამასთანავე, საზოგადოების მაღალი ინტერესიდან გამომდინარე გამოძიების დაწყებასა და მიმდინარეობასთან დაკავშირებით უზრუნველყოს საზოგადოების ინფორმირება.

21 მარტს მთავარ არხთან ინტერვიუში სავარაუდოდ, სუს-ის ყოფილი თანამშრომელი ამბობს, რომ პოლიტიკოსების პირადი ცხოვრების ამსახველ კადრებს იწერდნენ, მათ შორის მოძრაობა ხალხის ლიდერს, ანა დოლიძეს. ტელეკომპანიის ინფორმაციით, ინტერვიუ 2019 წელს არის ჩაწერილი და რესპონდენტი უკვე დაკავებულია. მათი თქმით, ინტერვიუ ახლა, მას შემდეგ გასაჯაროვდა, რაც TV პირველმა შს მინისტრის მოადგილის, კახაბერ საბანაძის ფარული ჩანაწერები გაასაჯაროვა. ამ სიუჟეტშიც იგივე პირი, ივანე გულაშვილი ფიგურირებდა. გულაშვილი აცხადებს, რომ ის დავალებებს მხოლოდ შს მინისტრის მოადგილისგან, კახაბერ საბანაძისგან იღებდა.

როგორც გულაშვილი აღნიშნავს, ფარული ჩანაწერების გარდა ის სხვადასხვა დავალებას იღებდა. იგი ამბობს, რომ მას გიორგი რურუას მანქანისთვის GPS-ის დაყენება მოუწია. გარდა ამისა, გულაშვილი მთავართან ყვება, აქციების დროს მას კონკრეტული ადამიანების ან მთლიანად აქციის თვალთვალი ევალება, როგორც დრონებით, ისე სათვალთვალო კამერებით, რასაც შემდგომში მაღალი თანამდებობის პირები აკვირდებოდნენ. მისივე მტკიცებით, 20 ივნისის ღამის შემდეგ საბანაძის დავალებით პარლამენტის სათვალთვალო კამერებიდან ჩანაწერები ამოიღეს და გაანადგურეს. ამასთან, აქციაზე მონიტორის დაზიანება უბრძანა, რათა გათიშულიყო.

კახაბერ საბანაძის ფარული ჩანაწერები TV პირველის ეთერში 20 მარტს გავიდა. არხის ინფორმაციიღ, წყარომ მიაწოდა ჩანაწერები, რომლითაც 2019 წლის აქციის ხელშეშლა და ტექნიკის დაზიანება საბანაძის დავალებით ხდებოდა. გარდა ამისა, ტელეკომპანიამ გაავრცელა საბანაძის სამუშაო კაბინეტში გადაღებული ფოტო, რომელიც მათი მტკიცებით ფარული სათვალთვალო კამერითაა გადაღებული. კახაბერ საბანაძემ თანამდებობა 23 მარტს დატოვა და მისი განცხადებით, უნდა ჩატარდეს სრულყოფილი და ობიექტური გამოძიება, რომელიც სიმართლეს დაადგენს.