სახალხო დამცველი დეკანოზ გიორგი მამალაძესთან შეხვედრის შემდეგ აცხადებს, რომ დაკავებულის თქმით, მის ბრალდებაში საუბარი არ ყოფილა სასულიერო პირზე:

"იგი ადასტურებს, რომ მაღალ იერარქზე, სასულიერო პირზე, საერთოდ არ არის აღნიშნული იმ ბრალში რომელიც მას წარედგინა და მე ვფიქრობ რომ ეს არის ძალიან მნიშვნელოვანი დეტალი".

ომბუდსმენის განცხადებით დეკანოზი ამბობს, რომ მას არ განუმარტეს დაკავების მიზეზი, ასევე საუბრობს იმაზეც, რომ შეუზღუდეს სატელეფონო ზარი:

"იგი აცხადებს რომ უდანაშაულოა, ბრძოლას აგრძელებს და ყველას სთხოვს სიმართლის დადგენას".

სახალხო დამცველის თქმით, დეკანოზი ითხოვს, რომ მისი ოჯახის უსაფრთხოება იყოს დაცული.

მთავარი პროკურატურის ცნობით, 2017 წლის 10 თებერვალს, მკვლელობის მომზადების ბრალდებით, დეკანოზი გიორგი მამალაძე დააკავეს. პროკურატურის მტკიცებით, გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ. უწყების განცხადებით, უცნობმა პირმა მიმართა პროკურატურას და მიუთითა, რომ მამალაძეს უნდა მოეხდინა მაღალი იერარქიის სასულიერო პირის სიცოცხლის ხელყოფა.