განახლება: ყოველთვის ვცდილობ დახმარებას, როცა შემიძლია — კაილი ჯენერი კრიტიკოსებს პასუხობს

სემუელ რაუდა — სტილისტი, რომლის ცნობილ კლიენტებს შორის მილიონერი კაილი ჯენერიცაა, მარტში ავტოავარიაში მოყვა. ამის შემდეგ სამედიცინო ხარჯების დასაფარად მისმა ოჯახმა პლატფორმა GoFundMe-ზე ფულის შეგროვება დაიწყო. გულშემატკივრები ელოდნენ, რომ კაილი ჯენერი სტილისტის სამედიცინო ხარჯებს დაფარავდა, თუმცა, ამის მაგივრად, კაილიმ ინსტაგრამზე გულშემატკივრებს მოუწოდა, რომ სემ რაუდასთვის თანხა შეეგროვებინათ.

"გთხოვთ, ყველამ ილოცოთ სემისთვის, რომელიც გასულ კვირას ავარიაში მოყვა და ესტუმროთ მისი ოჯახის შექმნილ GoFundMe-ს", — წერს მილიონერი კაილი ჯენერი.

აღსანიშნავია, რომ Forbes-ის მიხედვით, კაილი ჯენერის ქონების ღირებულება $900 მილიონია. კაილიმ პლატფორმაზე სტილისტის დასახმარებლად $5 000 გადარიცხა. ამას საზოგადოების უარყოფითი რეაქცია მოჰყვა და უამრავმა ადამიანმა გაღიზიანება ტვიტერზე გამოხატა:

"მოიცადეთ, ანუ კაილი ჯენერის სტილისტი ავტოავარიაში მოყვა და $60 000 ტვინის გადაუდებელი ოპერაციისთვის სჭირდებოდა და მან საკუთარ გულშემატკივრებს სთხოვა დახმარება? და შემდეგ მხოლოდ $ 5 000 გადარიცხა, როცა თავად მილიარდერია? არასწორ ადამიანებს აქვთ ფული."

"კაილი ჯენერმა ახალფეხადგმულ ბავშვს $15 000-ის ღირებულების ხელჩანთა უყიდა და ახლა საკუთარ გულშემატკივრებს სთხოვს ფულს."

"კაილი ჯენერი ისე გვთხოვს ფულს, თითქოს Forbes-ის სიაში ჩვენ მოვხვდით."

მიუხედავად კრიტიკის ქარცეცხლისა და უარყოფითი რეაქციებისა, სემუელ რაუდას საზოგადოებამ უკვე თითქმის $100 000 შეუგროვა.

აღსანიშნავია, რომ 2019 წლის მარტს კაილი ჯენერი Forbes-მა ყველაზე ახალგაზრდა მილიარდერად დაასახელა, რომელმაც ფული დამოუკიდებლად იშოვა, თუმცა 2020 წელს Forbes-მა კაილი ჯენერი სიცრუეში დაადანაშაულა და განაცხადა, რომ კარდაშიან-ჯენერების ოჯახმა კაილის ქონების შესახებ Forbes-ს არასწორი ცნობები მიაწოდეს.

ამავე თემაზე: