შავი ზღვის საერთაშორისო უნივერსიტეტი (IBSU) შეუფერხებლად აგრძელებს საგანმანათლებლო საქმიანობას. ამის შესახებ განცხადება IBSU-ს ფეისბუკ გვერდზე გამოქვეყნდა. განცხადების თანახმად, ჩაღლარის საგანმანათლებლო დაწესებულებებს, მათ შორის IBSU-ს არანაირი საფრთხე არ ემუქრება:

"გვინდა გაცნობოთ, რომ უნივერსიტეტის შესახებ გავრცელებული სხვადასხვა ტიპის გადაუმოწმებელი ინფორმაციის გავრცელების მიუხედავად შეშფოთების საფუძველი სტუდენტებისთვის და უნივერსიტეტთან დაკავშირებული სხვა პირებისა თუ ინსტიტუტებისთვის არ არსებობს. უნივერსიტეტი შეუფერხებლად აგრძელებს სალექციო პროცესს და საგანმანათლებლო საქმიანობასთან დაკავშირებულ ყველა სამუშაოს."

საქმე ეხება ამერიკის ხმის სტატიას, რომლის თანახმად, ფეთულა გიულენთან დაკავშირებულ ჩაღლარის საგანმანათლებლო ქსელი, რომელიც შავი ზღვის საერთაშორისო უნივერსიტეტს, დემირელის სახელობის სკოლასა და რამდენიმე საშუალო სკოლა-ლიცეუმს მოიცავს, სავარაუდოდ, გასხვისდება. ამ პროცესში კი თურქეთის ხელისუფლების ინტერესები იკვეთება. ამასთან ამერიკის ხმასთან საუბარი არ ისურვეს არც შავი ზღვის საერთაშორისო უნივერსიტეტისა და არც დემირელის სახელობის სკოლის წარმომადგენლებმა.