მაიკლ ფლინი, ტრამპის მრჩეველი ეროვნული უსაფრთხოების საკითხებში, იძულებული გახდა გადამდგარიყო მას შემდეგ, რაც მის მიმართ გაისმა სერიოზული ბრალდებების რუსეთის ხელისუფლებასთან კავშირის გამო.

ფლინმა გადადგომის შესახებ 13 თებერვალს, საღამოს განაცხადა. CNN-ის მიერ მოპოვებულ წერილში, რომელიც ფლინმა გადადგომასთან დაკავშირებით დაწერა, ის აღიარებს გარკვეულ კავშირს რუსეთის ხელისუფლების წარმომადგენელთან. კერძოდ, საქმე ეხება ფლინის სატელეფონო ზარს აშშ-ში რუსეთის ელჩთან, რომელიც შედგა ჯერ კიდევ ტრამპის ინაუგურაციამდე. შესაბამისად, ამ დროს ფლინს არც პრეზიდენტის მრჩევლის პოსტი ეკავა, ის მხოლოდ მრჩევლობის კანდიდატი იყო.

ფლინი აღნიშნულ სატელეფონო საუბარზე გადადგომის შესახებ გამოქვეყნებულ წერილში წერს:

"უყურადღებობის გამო არჩეულ ვიცე-პრეზიდენტსა და სხვებს მივაწოდე არასრული ინფორმაცია რუსეთის ელჩთან ჩემი საუბრის შესახებ".

ამერიკული მედია ჯერ კიდევ პრეზიდენტის ინაუგურაციამდე წერდა აღნიშნული სატელეფონო საუბრის შესახებ. მათი ცნობით, იუსტიციის დეპარტამენტმა ტრამპის მომავალი ადმინისტრაცია გააფრთხილა ფლინი-რუსეთის ელჩის კავშირისა და იმასთან დაკავშირებითაც, რომ ამის გამო ფლინი "რუსეთის მხრიდან შანტაჟისადმი მოწყვლადი იყო".

დემოკრატები მაიკლ ფლინის სამსახურიდან გაშვებას თავიდანვე მოითხოვდნენ, რადგან აშშ-ს რიგით მოქალაქეებს არა აქვთ უფლება, აწარმოონ დიპლომატიური მოლაპარაკებები სხვა ქვეყნებთან აშშ-ს სახელით. აღნიშნული ზარის განხორციელებისას კი ფლინს არანაირი სახელმწიფო პოსტი არ ეკავა, ის მხოლოდ და მხოლოდ ტრამპის გუნდის წევრი იყო.

დემოკრატიული პარტიის წარმომადგენელთა მტკიცებით, მაიკლ ფლინმა ჯერ კიდევ თანამდებობაზე დანიშვნამდე, აშშ-ში რუსეთის ელჩთან, სერგეი კისლიაკთან განიხილა რუსეთისთვის სანქციების მოხსნის საკითხი. თუმცა, BBC-ის ცნობით, რუსეთის პრეზიდენტის პრესსპიკერმა, პესკოვმა, აღნიშნული ინფორმაცია უარყო და თქვა, რომ მსგავს საკითხზე მოლაპარაკება არ ყოფილა.

თუმცა, მედიაში ჯერ კიდევ გასული წლის დეკემბერში ვრცელდებოდა ინფორმაცია ფლინის მიერ რუს მაღალჩინოსნებთან განხორციელებული არაერთი სატელეფონო ზარის შესახებ. თავდაპირველად ყველა, მათ შორის ვიცეპრეზიდენტი მაიკ პენსი, უარყოფდა აღნიშნულ ბრალდებებს, ტრამპის პრესსპიკერმაც თავდაპირველად განაცხადა, რომ პრეზიდენტი ენდობოდა ფლინს, შემდეგ თქვა, რომ ის "აფასებდა შექმნილ მდგომარეობას", საბოლოოდ კი მაიკლ ფლინი გადადგა.

როგორც ამერიკული პოლიტიკური გამოცემა, პოლიტიკო წერს, მაიკლ ფლინის გადადგომამ "გამოიწვია ქაოსი ტრამპის ახლად დაწყებული პრეზიდენტობის დასაწყისშივე და გააჩინა კითხვები, რამდენად შეუძლია პრეზიდენტს, გაუმკლავდეს ეროვნული უსაფრთხოების საკითხებს პრეზიდენტობის პირველივე თვეს".