დღეს, 18 მარტს საკოორდინაციო საბჭომ შეზღუდვების შემსუბუქება დააანონსა. მიუხედავად იმისა, რომ მთავრობა თანახმაა გახსნას სხვადასხვა დაწესებულებები, ისევ უარს ამბობენ კომენდანტის საათის მოხსნაზე. ასევე, მთავრობამ უარი უთხრა მუსლიმ თემს ნოვრუზ ბაირამის აღსანიშნავად 1 ღამით გადაადგილების შეზღუდვის მოხსნაზე, მაშინ, როცა იგივე პრივილეგია მინიჭებული ჰქონდა მართლმადიდებელ ეკლესიას.

რაც შეეხება შემსუბუქებებს, საკოორდინაციო საბჭოს დღევანდელი სია ასეთია:

  • ხვალიდან, 19 მარტიდან, დასაშვები იქნება ცოცხალი მუსიკა რესტორნებში.
  • პირველი აპრილიდან რეგულაციების დაცვით მუშაობის განახლების საშუალება მიეცემათ საბავშვო გასართობ ცენტრებსა და კინოთეატრებს.
  • სპორტულ აქტივობებზე დასწრება შესაძლებელი გახდება, მაგრამ რეგულაციების დაცვით.

"28 მარტს დაგეგმილია საქართველო-ესპანეთის ნაკრების საფეხბურთო მატჩი. საკოორდინაციო საბჭომ მიიღო გადაწყვეტილება, დაუშვას მატჩზე მაყურებლის დასწრება დისტანციის და ყველა შესაბამისი ეპიდემიოლოგიური უსაფრთხოების სტანდარტის დაცვით. სტადიონზე დაშვებული იქნება მაყურებელთა 30%. ასევე, იმართება ძიუდოში გრანდსლემი, რომელზეც ასევე დაიშვება მაყურებელთა 30%", — განაცხადეს ბრიფინგზე.

საკოორდინაციო საბჭოში აცხადებენ, რომ ღამით გადაადგილების შეზღუდვა რჩება, რადგან ეს არის ერთ-ერთი ყველაზე ქმედითი ბერკეტი მობილობის შესამცირებლად.