ევროკავშირი და გაეროს ბავშვთა ფონდი საქართველოში ბავშვთა დაცვის სისტემების გასაუმჯობესებლად ერთიანდება. ამის შესახებ ინფორმაციას UNICEF ავრცელებს.

განცხადებაში ვკითხულობთ, რომ პროექტის — ბავშვთა დაცვის სისტემების და მომსახურებების გაძლიერება საქართველოში მიზანია, დაეხმაროს მთავრობას ბავშვის უფლებათა კოდექსის განხორციელებაში, მათ შორის, დაგეგმილი ღონისძიებების დეცენტრალიზაციაში, ადგილობრივ დონეზე ბავშვთა უფლებების პატივისცემისა და დაცვის გაუმჯობესების მიზნით. ევროკავშირის ელჩის საქართველოში, კარლ ჰარცელის განცხადებით, ერთობლივი პროექტი გააძლიერებს მართლმსაჯულების სისტემაში ბავშვზე მორგებულ მიდგომებს.

"პროექტი ინტენსიურად იმუშავებს ადგილობრივ მთავრობებთან და მუნიციპალურ სოციალურ მუშაკებთან, რათა დაუცველ ბავშვებს და ოჯახებს ხელი მიუწვდებოდეთ აუცილებელ მომსახურებებთან. ბავშვთა უფლებები, ისევე როგორც სხვა უფლებები, არ ექვემდებარება გადახედვას. ჩვენ მოუთმენლად ველით მჭიდრო თანამშრომლობას ქართველ პარტნიორებთან ბავშვებისთვის უსაფრთხო გარემოს შექმნის მიზნით", — განაცხადა ჰარცელმა.

პროექტს განახორციელებს გაეროს ბავშვთა ფონდი, საქართველოს მთავრობასთან პარტნიორობით და ევროკავშირის ფინანსური მხარდაჭერით. პროექტი სამწლიანია და მისი საერთო ბიუჯეტია 2 მილიონი ევრო.