ევროპული საქართველოს ლიდერის, გიგა ბოკერია ევროკავშირის წარმომადგენლობაში დღევანდელ შეხვედრას რთულსა და მძიმეს უწოდებს. დღეს, 17 მარტს ევროპული საბჭოს პრეზიდენტის წარმომადგენელთან, კრისტიან დანიელსონთან ერთად მოლაპარაკებებში ოპოზიციამ და ქართულმა ოცნებამ ერთობლივად მიიღეს მონაწილეობა.

"ძალიან რთული და მძიმე მოლაპარაკებების დღე იყო. ის, რომ პრეზიდენტი მიშელის პოლიტიკური ინვესტიცია ამ პროცესში არის დიდი, დადასტურდა გუშინდელი განცხადებების შემდეგ ხელისუფლების მხრიდან ამ პროცესის გაგრძელებით. ის რომ ეს ადამიანი აქ არის და ხვალაც რჩება, არის კარგი და არის შანსი, რომ კრიზისიდან გამოვიდეთ მოლაპარაკებების შედეგად", — აღნიშნა ბოკერიამ.

ოპოზიციის სხვა ლიდერების მსგავსად მანაც უარი თქვა მოლაპარაკებების შინაარსზე ესაუბრა. შეხვედრიდან გამოსული ოპოზიციონერები აცხადებენ, რომ შეთანხმება უნდა მოხდეს ყველაფერზე, სხვა შემთხვევაში ის არ იარსებებს.

დღეს გაიმართა პირველი ერთობლივი შეხვედრა ქართულ ოცნებასა და ოპოზიციას შორის, ევროკავშირის წარმომადგენლის, კრისტიან დანიელსონის მონაწილეობით. შვედი დიპლომატი აქამდე მხოლოდ ინდივიდუალურად ხვდებოდა პარტიებს.

კრისტიან დანიელსონი, რომელიც ევროპული საბჭოს პრეზიდენტის, შარლ მიშელის პირადი წარმომადგენელია ქართულ ოცნებასა და ოპოზიციას შორის მედიაციის პროცესში, მეექვსე დღეა მართავს შეხვედრებს. გარდა პარტიების ლიდერებისა, იგი შეხვდა არასამთავრობო ორგანიზაციების წარმომადგენლებს. ასევე, რამდენჯერმე შეხვდა პრეზიდენტ სალომე ზურაბიშვილსაც.

14 მარტი იყო დანიელსონის ვიზიტის ბოლო დღე საქართველოში, თუმცა, პარტიებთან შეხვედრების შემდეგ, მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

15 მარტს დანიელსონი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.

გაიგეთ მეტი: