ჯორჯიის შტატის ქალაქ ატლანტაში სამ სპა სალონზე ცეცხლსასროლი იარაღით თავდასხმის შედეგად რვა ადამიანი დაიღუპა, მათ შორის სულ მცირე ექვსი აზიელი ქალია. პოლიციამ თავდასხმაში ბრალდებული 21 წლის კაცი უკვე დააკავა. სროლის მოტივი ჯერჯერობით უცნობია.

თავდასხმაში ბრალდებული რობერტ აარონ ლონგი

პირველი თავდასხმა ადგილობრივი დროით, საღამოს ხუთ საათზე Youngs Asian Massage-ზე განხორციელდა, რომელიც ატლანტადან 50 კილომეტრშია. სროლის შედეგად ოთხი ადამიანი გარდაიცვალა და კიდევ ერთი დაიჭრა. გარდაცვლილთაგან სამი ქალი იყო. თითქმის ერთ საათში პოლიცია ატლანტაში მდებარე Golden Spa-ში გამოიძახეს, სადაც სამი გარდაცვლილი ქალი დახვდათ. მალევე სამართალდამცავები ერთი ქუჩის იქით მდებარე Aromatherapy Spa-ში გადავიდნენ, სადაც ერთი გარდაცვლილი ქალი იყო.

ფოტო: AP

ფოტო: AP

როგორც BBC წერს, ბოლო პერიოდში აზიური წარმომავლობის ამერიკელების მიმართ სიძულვილის ენა გახშირდა. რასაც ხელს უწყობს რიტორიკა, რომ COVID-19 აზიელებმა გაავრცელეს.

ბრალდებული რობერტ აარონ ლონგი ატლანტადან 240 კილომეტრში, კრისპის ოლქში დააკავეს. პოლიცია დარწმუნებულია, რომ სამივე თავდასხმაზე ერთი პირია პასუხისმგებელი. ამავე დროს, ისინი აცხადებენ, რომ ჯერ ნაადრევია იმაზე საუბარი, იყო თუ არა ეს რასობრივ და ეთნიკურ ნიადაგზე ჩადენილი დანაშაული.