უკვე რამდენიმე საათია კალიფორნიის შტატში, სან ფრანცისკოდან 240 კილომეტრში მოსახლეობის სასწრაფო ევაკუაცია მიმდინარეობს. ადგილობრივი მედიის ცნობით, ევაკუაციის ბრძანება 188 ათას ადამიანს შეეხო.

გადაუღებელი წვიმების შედეგად თითქმის დასაშვებ ზღვრამდე გაივსო ოროვილის ტბა, სადაც მდებარეობს ამერიკის შეერთებულ შტატებში ყველაზე მაღალი - 230-მეტრი სიმაღლის კაშხალი.

დაზიანებული წყალგამტარი. ოროვილის დამბა, აშშ.

დაზიანებული წყალგამტარი. ოროვილის დამბა, აშშ.

ფოტო: twitter.com/EmperorNorton

რამდენიმე დღის წინ ოროვილის კაშხლის ერთ-ერთ წყალგამტარ არხში ფსკერი ჩავარდა, დაზიანების მასშტაბი კი ბოლო დღეებში კიდევ უფრო გაფართოვდა, რამაც მოსახლეობისთვის საფრთხე წარმოქმნა.

უკვე რამდენიმე საათია, კილომეტრიანი კოლონები ტოვებენ კაშხლის მიმდებარე დასახლებებს.

კაშხლის წყალგამტარ არხში გაჩენილი ნახვრეტიდან წყლის ნაკადი თავდაპირველად ძლიერად მოედინებოდა, თუმცა, მას შემდეგ რაც ევაკუაცია დაიწყო, ის მცირედით შემცირდა. ინჟინრები მუშაობენ გეგმაზე, თუ როგორ შეამცირონ წყლის დონე ოროვილის ტბაში, რათა შეძლონ დაზიანებული წყალგამტარის შეკეთება.

ოროვილის ტბა 1960-იან წლებში დააგუბეს კაშხლის ასაგებად. რამდენიმეწლიანი გვალვის გამო, წყლის დონემ ტბაში თითქმის ისტორიულ მინიმუმს მიაღწია 2015 წელს, თუმცა, უკვე ერთი წელია, რაც იქ ძლიერი წვიმები დაიწყო, შესაბამისად, წყლის დონემ მაქსიმუმამდე გაიზარდა.