შვიდი წლის მეიდენი, რომელიც ამერიკის შტატ ოკლაჰომაში ცხოვრობს, ტუჩისა და სასის თანდაყოლილი ნაპრალით (ასევე ცნობილი, როგორც "კურდღლის ტუჩი") და სხვადასხვა ფერის თვალებით დაიბადა.

მიუხედავად იმისა, რომ ასეთი განსაკუთრებულობის გამო მას შეუძლია თამამად იამაყოს, ერთხელ სკოლის ავტობუსში მისი გარეგნობა აუგად მოიხსენიეს, რამაც მის თვითშეფასებაზე საშინლად იმოქმედა.

მეიდენის დედამ, კრისტინა ჰამფრეიზმა, გულგატეხილობის მიუხედავად, გადაწყვიტა, თავის ვაჟთან ერთად საჯარო ვიდეო გადაეღო, სადაც ამ ფაქტზე ღიად ისაუბრებდნენ. მათ მიერ ამ ისტორიის ღიად გაზიარებას დადებითი გამოხმაურება მოჰყვა, რამაც მეიდენს უკეთ აგრძნობინა თავი.

თუმცა მშობლებმა მისი გახარება კიდევ უფრო განსაკუთრებული მიზეზითაც შეძლეს.

ფოტო: CHRISTINA HUMPHREYS

ერთხელ სოცილურ ქსელში ცხოველთა თავშესაფრის მიერ გამოქვეყნებულ ინფორმაციას გადააწყდნენ კატის შესახებ, რომელსაც გარეგნობის ზუსტად ისეთივე თანდაყოლილი ნიშნები ჰქონდა, როგორც მეიდენს.

მიუხედავად იმისა, რომ კატა ოკლაჰომადან 1500 კილომეტრით დაშორებით, მინესოტას შტატში იმყოფებოდა, ბევრი არ უფიქრიათ, ისე გადაწყვიტეს, რომ თავშესაფრიდან წამოეყვანათ.

ფოტო: CHRISTINA HUMPHREYS

მას შემდეგ მეიდენი და მუნი (Moon, მთვარე – ეს სახელი შეურჩიეს კატას), რომელთაც ტუჩის თანდაყოლილი ნაპრალი და სხვადასხვა ფერის თვალები აქვთ, საუკეთესო მეგობრები გახდნენ.

ფოტო: CHRISTINA HUMPHREYS

როგორც მუნი გადაარჩინეს მინესოტას ქუჩებში უპატრონოდ ყოფნას, ისე დაეხმარა ის მეიდენს მარტოობასთან გამკლავებაში.

და, რაც მთავარია, იმის გაცნობიერებაში, რომ განსხვავებულობა უცნაურად კი არა, უნიკალურად გაქცევს.