ქართული ოცნების დეპუტატს, ალუდა ღუდუშაურს მიაჩნია, რომ საქართველოს მთავრობა ევროპელი პარტნიორების წინაშე "წელში გამართული" წარდგება. როგორც ღუდუშაური ამბობს, ხელისუფლებას აქვს ხელშესახები პროგრესი დემოკრატიულობისა და სამართლიანობის კუთხით.

"აქედან გამომდინარე ქართულ ოცნებას მართლაც აქვს სავსე ხელები და, ბუნებრივია, მართლაც დამაჯერებელია ჩვენი პროგრესი, აქედან გამომდინარეობს ის, რომ ჩვენ ნამდვილად წელში გამართულები წარვდგებით ევროპაში ჩვენს ევროპელ პარტნიორებთან", — ამბობს დეპუტატი.

14 მარტს, ევროპული საბჭოს პრეზიდენტის წარმომადგენელთან, კრისტიან დანიელსონთან შეხვედრის შემდეგ ქართული ოცნების თავმჯდომარემ, ირაკლი კობახიძემ განაცხადა, რომ პრემიერი ბრიუსელში მსხვილი პაკეთით მიდის, ხოლო ოპოზიცია ცარიელი ხელებით არის დარჩენილი.

დღეს საქართველოს პრემიერმინისტრი ირაკლი ღარიბაშვილი ბრიუსელში გაემგზავრა, სადაც საქართველო-ევროკავშირის ასოცირების საბჭოს მე-6 სხდომაში მიიღებს მონაწილეობას.

ვიზიტის ფარგლებში გაიმართება მაღალი დონის შეხვედრები როგორც ევროკომისიაში, ევროპულ საბჭოსა და ევროპარლამენტში, ასევე — ნატოში. პირველ შეხვედრას ირაკლი ღარიბაშვილი დღეს, 15 მარტს ევროპული საბჭოს პრეზიდენტ შარლ მიშელთან გამართავს.

16 მარტს, საქართველო-ევროკავშირის ასოცირების საბჭოს სხდომის შემდეგ, გაიმართება პრემიერ-მინისტრ ირაკლი ღარიბაშვილის, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის ჟოზეფ ბორელის და ევროპული სამეზობლო პოლიტიკისა და გაფართოების საკითხებში ევროკომისარ ოლივერ ვარჰეის ერთობლივი პრესკონფერენცია.

17 მარტს შეხვედრები შედგება ევროპარლამენტსა და ნატოში. საქართველოს მთავრობის მეთაურს ნატოს შტაბბინაში ალიანსის გენერალური მდივანი იენს სტოლტენბერგი უმასპინძლებს. შეხვედრის შემდეგ, ირაკლი ღარიბაშვილის და იენს სტოლტენბერგის ერთობლივი პრესკონფერენცია გაიმართება. ასევე, დაგეგმილია ნატო-საქართველოს კომისიის სხდომა.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.