ევროპული საქართველოს ერთ-ერთი ლიდერის, დავით ბაქრაძის განცხადებით, დღეს გამართულ მოლაპარაკებებზე დადებითი დინამიკა ჰქონდათ, თუმცა აღნიშნავს, რომ შეთანხმება ჯერ მიღწეული არ არის და პროცესი გრძელდება. იგივეს აცხადებენ ევროპული საბჭოს პრეზიდენტ შარლ მიშელის წარმომადგენელთან შეხვედრის შემდეგ სხვა ოპოზიციური პარტიის ლიდერებიც.

"დღეს მოლაპარაკებებში პოზიტიური დინამიკა გვქონდა, მაგრამ, ასევე, მკაფიოდ მინდა ვთქვა, რომ შეთანხმება მიღწეული ჯერ არ არის და შეთანხმების 6-პუნქტიანი ჩარჩო დოკუმენტი შეთანხმებული არ არის. შეხვედრები დღეს გაგრძელდება. ბატონ დანიელსონის წასვლამდე ჩვენ კიდევ გვექნება შეხვედრა ამ ოფისში და იმედი მაქვს, რომ ყველამ ერთად მოვახერხებთ პროცესი ბოლომდე მივიყვანოთ", — განაცხადა ბაქრაძემ.

კრისტიან დანიელსონი მესამე დღეა მხარეებთან შეხვედრებს მართავს. ის ქართული ოცნებისა და ოპოზიციის წარმომადგენლებს ცალ-ცალკე ხვდება.

დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: