პარტია გირჩი — მეტი თავისუფლების ლიდერის, ზურაბ ჯაფარიძის განცხადებით, ქართულ ოცნებასთან მოლაპარაკებებზე პლებისციტის საკითხი ოპოზიციის მხრიდან კომპრომისია.

"პრინციპული საკითხებია პოლიტიკური პატიმრების გათავისუფლება და დევნის შეწყვეტა. ამის გარეშე საუბრის შინაარს აზრი არ აქვს. იმიტომ, რომ შეუძლებელია შენ ადამიანს ელაპარაკებოდა და ის გიჭერდეს. მეორე არის ხელახალი არჩევნები. ერთ-ერთ ვერსიად ხელახალ არჩევნებამდე მისასვლელად მოლაპარაკებების მაგიდაზე პლებისციტის იდეა დევს. ჩემთვის პრინციპულად მნიშვნელოვანი საკითხი არის, რომ ქვეყანაში ერთპარტიული მმართველობა და პოლარიზაცია დასრულდეს და ამის წამალი არის სრულად პროპორციული სისტემა ბუნებრივი ბარიერით, მართლმსაჯულების სისტემის რეფორმირება და რაც დატოვა შარლმ მიშელმა, ძალაუფლების განაწილება და ა.შ.

პლებისციტი, ცხადია, ოპოზიციის მხრიდან კომპრომისია", — განაცხადა მან კრისტიან დანიელსონთან შეხვედრის დაწყებამდე.

კრისტიან დანიელსონი მესამე დღეა მხარეებთან შეხვედრებს მართავს. ის საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: