თბილისის მერის, კახა კალაძის განცხადებით, მერობის კანდიდატის დასახელებამდე შვიდი თვეა დარჩენილი და პარტია არჩევნებამდე დაახლოებით თვენახევრით ადრე დაასახელებს კანდიდატს.

როგორც მერმა განაცხადა, ის მონაწილეობს კონსულტაციებში, რომელზეც თვითმმართველობის არჩევნებში წარსადგენ კანდიდატებზე მიმდინარეობს მსჯელობა.

"რაც შეეხება თბილისის მერობის კანდიდატს, მე ვარ ქალაქის მერი, ვაგრძელებ ჩემს საქმიანობას, შესაბამისად, როდესაც გადაწყვეტილება იქნება პარტიაში მიღებული კანდიდატთან დაკავშირებით, ერთი თვით, თვე-ნახევრით ადრე გახდება ცნობილი საზოგადოებისთვის", — აღნიშნა კახა კალაძემ.

ტელეკომპანია ფორმულამ 11 მარტს გაავრცელა ინფორმაცია, რომ ქართული ოცნება თბილისის მერობის კანდიდატად ზურაბ პოლოლიკაშვილს განიხილავს, რომელიც 2018 წლიდან გაეროში, მსოფლიო ტურიზმის ორგანიზაციის გენერალური მდივანია.